halki si bhi kanon mein sada tak nahin aati

halkī sī bhī kānoñ meñ sadā tak nahīñ aatī

gulzār meñ ab bād-e-sabā tak nahīñ aatī

sab bhuul ga.ī jaise sabaq sharm-o-hayā ke

ab sar pe nazar us ke ridā tak nahīñ aatī

kuchh aisī ḳhafā mujh se mirī jaan huī hai

ab haal mirā karne pata tak nahīñ aatī

maiñ us ko manā.ūñ bhī to kis tarah manā.ūñ

batlāne mujhe merī ḳhatā tak nahīñ aatī

taslīm tujhe kaise vafādār maiñ kar luuñ

lahje se tire bū-e-vafā tak nahīñ aatī

har khiḌkī ta.alluq kī muqaffal hai abhī to

kamre meñ mohabbat kī havā tak nahīñ aatī

haiñ hosh meñ pī kar tirī mastāna nazar se

rindoñ ko bahakne kī adā tak nahīñ aatī

kyoñ us se hai ummīd-e-vafā aap ko 'ālam'

jab karnī use mashq-e-jafā tak nahīñ aatī

halki si bhi kanon mein sada tak nahin aati

gulzar mein ab baad-e-saba tak nahin aati

sab bhul gai jaise sabaq sharm-o-haya ke

ab sar pe nazar us ke rida tak nahin aati

kuchh aisi KHafa mujh se meri jaan hui hai

ab haal mera karne pata tak nahin aati

main us ko manaun bhi to kis tarah manaun

batlane mujhe meri KHata tak nahin aati

taslim tujhe kaise wafadar main kar lun

lahje se tere bu-e-wafa tak nahin aati

har khiDki talluq ki muqaffal hai abhi to

kamre mein mohabbat ki hawa tak nahin aati

hain hosh mein pi kar teri mastana nazar se

rindon ko bahakne ki ada tak nahin aati

kyon us se hai ummid-e-wafa aap ko 'alam'

jab karni use mashq-e-jafa tak nahin aati