hum aae jab to bujha kar charagh-e-dar aae

ham aa.e jab to bujhā kar charāġh-e-dar aa.e

ki aur koī na tanhā.iyoñ ke ghar aa.e

ubhārne ke liye naqsh kūza-gar aa.e

to ḳhud hī uḌ ke mirī ḳhāk-e-chāk par aa.e

jahāñ-jahāñ bhī añdheroñ kī hukmrānī thī

charāġh-e-naqsh-e-qadam ham jalā ke dhar aa.e

fazā-e-dasht se mānūs ho gayā mirā dil

agarche sāmne hir-phir ke bām-o-dar aa.e

na bastiyāñ thiiñ na vo bām-o-dar na vo chehre

hamāre qāfile jis vaqt lauT kar aa.e

ye rishta sang-o-samar kā bahut purānā hai

chale haiñ sang bhī jab shāḳh par samar aa.e

nigāh ḳham jo huī dil jo ḳhāk-e-rāh huā

mire qarīb ka.ī log mo'atabar aa.e

kabhī to mauj-e-suḳhan mehrbāñ ho mere liye

kabhī to haath koī dāna-e-guhar aa.e

ye dasht kyoñ nahīñ detā koī javāb mujhe

ye kyā ki bas mirī āvāz lauT kar aa.e

ajab hai adl kā me.aar us kī bastī meñ

ḳhirad gunāh kare aur junūñ ke sar aa.e

jab us ke aane kī ummīd hī nahīñ 'yāvar'

ab is se kyā mujhe shaam aa.e yā sahar aa.e

hum aae jab to bujha kar charagh-e-dar aae

ki aur koi na tanhaiyon ke ghar aae

ubhaarne ke liye naqsh kuza-gar aae

to KHud hi uD ke meri KHak-e-chaak par aae

jahan-jahan bhi andheron ki hukmrani thi

charagh-e-naqsh-e-qadam hum jala ke dhar aae

faza-e-dasht se manus ho gaya mera dil

agarche samne hir-phir ke baam-o-dar aae

na bastiyan thin na wo baam-o-dar na wo chehre

hamare qafile jis waqt lauT kar aae

ye rishta sang-o-samar ka bahut purana hai

chale hain sang bhi jab shaKH par samar aae

nigah KHam jo hui dil jo KHak-e-rah hua

mere qarib kai log mo'atabar aae

kabhi to mauj-e-suKHan mehrban ho mere liye

kabhi to hath koi dana-e-guhar aae

ye dasht kyon nahin deta koi jawab mujhe

ye kya ki bas meri aawaz lauT kar aae

ajab hai adl ka mear us ki basti mein

KHirad gunah kare aur junun ke sar aae

jab us ke aane ki ummid hi nahin 'yawar'

ab is se kya mujhe sham aae ya sahar aae