hum aaj bahut un ko KHafa dekh rahe hain

ham aaj bahut un ko ḳhafā dekh rahe haiñ

ai shoḳhī-e-taqdīr ye kyā dekh rahe haiñ

ye aap kī pursish kā milā hai hameñ in.aam

kuchh dard-e-mohabbat ko sivā dekh rahe haiñ

pahchān meñ aate nahīñ pahchāne hue log

badlī huī duniyā kī havā dekh rahe haiñ

ham amn ke ghar meñ haiñ magar ye bhī to sach hai

mañDlātī huī sar pe qazā dekh rahe haiñ

kuchh aur sivā ho ga.iiñ be-tābiyāñ dil kī

kyā ḳhuub ye tāsīr-e-duā dekh rahe haiñ

har samt añdherā hai añdherā hai añdherā

phailī huī zulfoñ kī ghaTā dekh rahe haiñ

kuchh kam nahīñ ye shaiḳh-o-barahman kī karāmāt

ham gosht se nāḳhun ko judā dekh rahe haiñ

lag jā.egā sūraj ko gahan aaj yaqīnan

ruḳh ko tire zulfoñ se ghirā dekh rahe haiñ

ye baat rahe pesh-e-nazar aap ke 'gauhar'

ab rang-e-ġhazal log nayā dekh rahe haiñ

hum aaj bahut un ko KHafa dekh rahe hain

ai shoKHi-e-taqdir ye kya dekh rahe hain

ye aap ki pursish ka mila hai hamein inam

kuchh dard-e-mohabbat ko siwa dekh rahe hain

pahchan mein aate nahin pahchane hue log

badli hui duniya ki hawa dekh rahe hain

hum amn ke ghar mein hain magar ye bhi to sach hai

manDlati hui sar pe qaza dekh rahe hain

kuchh aur siwa ho gain be-tabiyan dil ki

kya KHub ye tasir-e-dua dekh rahe hain

har samt andhera hai andhera hai andhera

phaili hui zulfon ki ghaTa dekh rahe hain

kuchh kam nahin ye shaiKH-o-barahman ki karamat

hum gosht se naKHun ko juda dekh rahe hain

lag jaega suraj ko gahan aaj yaqinan

ruKH ko tere zulfon se ghira dekh rahe hain

ye baat rahe pesh-e-nazar aap ke 'gauhar'

ab rang-e-ghazal log naya dekh rahe hain