hum ab jazbaat-o-ehsasat se ye kaam lete hain

ham ab jazbāt-o-ehsāsāt se ye kaam lete haiñ

kisī ke choT aa.e ham kaleja thaam lete haiñ

musalsal roz-o-shab kī gardishoñ se kaam lete haiñ

sukūn-e-sub.h se ham iztirāb-e-shām lete haiñ

samajhte haiñ adā-e-shukr ko hī kaif-o-sarmastī

tahī mai-ḳhāna-e-fitrat se jab ham jaam lete haiñ

sitam be-fikr ho kar banda-parvar kījiye ham par

ham apnī zaat par har baat kā ilzām lete haiñ

kiyā karte haiñ qaa.em surḳhiyāñ rūdād-e-ulfat kī

mire aañsū mire zaḳhmī jigar se kaam lete haiñ

qayāmat phir bapā hone lagī shauq-e-shahādat meñ

vo apne haath meñ phir teġh-e-ḳhūñ-āshām lete haiñ

mohabbat hai ḳhayāl-e-ḳhām lekin tere dīvāne

junūñ meñ raat din lutf-e-ḳhayāl-e-ḳhām lete haiñ

ye ulfat hai vo saudā jis meñ yūñhī hotī aa.ī hai

hamesha dil jo dete haiñ ġham-o-ālām lete haiñ

umīdeñ saḳht-jānī ban ga.ī haiñ varna ai 'nāmī'

ham apnī maut se paiġhām par paiġhām lete haiñ

hum ab jazbaat-o-ehsasat se ye kaam lete hain

kisi ke choT aae hum kaleja tham lete hain

musalsal roz-o-shab ki gardishon se kaam lete hain

sukun-e-subh se hum iztirab-e-sham lete hain

samajhte hain ada-e-shukr ko hi kaif-o-sarmasti

tahi mai-KHana-e-fitrat se jab hum jam lete hain

sitam be-fikr ho kar banda-parwar kijiye hum par

hum apni zat par har baat ka ilzam lete hain

kiya karte hain qaem surKHiyan rudad-e-ulfat ki

mere aansu mere zaKHmi jigar se kaam lete hain

qayamat phir bapa hone lagi shauq-e-shahadat mein

wo apne hath mein phir tegh-e-KHun-asham lete hain

mohabbat hai KHayal-e-KHam lekin tere diwane

junun mein raat din lutf-e-KHayal-e-KHam lete hain

ye ulfat hai wo sauda jis mein yunhi hoti aai hai

hamesha dil jo dete hain gham-o-alam lete hain

umiden saKHt-jaani ban gai hain warna ai 'nami'

hum apni maut se paigham par paigham lete hain