hum ahl-e-dil hain samajhte hain aashiqi kya hai

ham ahl-e-dil haiñ samajhte haiñ āshiqī kyā hai

junūñ-nazīr batā.eñge bandagī kyā hai

charāġh āñkhoñ ke bujhte haiñ raat aate hī

shab-e-alam ke asīroñ ko raushnī kyā hai

atā-e-ḳhās hai terī mire liye yā-rab

ye harf-o-saut haiñ kyā aur āgahī kyā hai

kisī kī zulf-e-mo.ambar kā ab ḳhayāl kahāñ

hayāt meñ hai tavāzun ye dil-lagī kyā hai

ye iztirāb nahīñ us se ab judā ho kar

to phir batāo ki āñkhoñ meñ ye namī kyā hai

sitam nasīb kā hai gar vo rah gayā pīchhe

ḳhud-e'timād bashar hai to phir kamī kyā hai

mirā junūñ ye mujhe kis dayār meñ laayā

bikhar gayā hai vajūd apnā bebasī kyā hai

'azīm' sab se bahut ehtiyāt se milnā

kahāñ samajhte haiñ ab log dostī kyā hai

hum ahl-e-dil hain samajhte hain aashiqi kya hai

junun-nazir bataenge bandagi kya hai

charagh aankhon ke bujhte hain raat aate hi

shab-e-alam ke asiron ko raushni kya hai

ata-e-KHas hai teri mere liye ya-rab

ye harf-o-saut hain kya aur aagahi kya hai

kisi ki zulf-e-moambar ka ab KHayal kahan

hayat mein hai tawazun ye dil-lagi kya hai

ye iztirab nahin us se ab juda ho kar

to phir batao ki aankhon mein ye nami kya hai

sitam nasib ka hai gar wo rah gaya pichhe

KHud-e'timad bashar hai to phir kami kya hai

mera junun ye mujhe kis dayar mein laya

bikhar gaya hai wajud apna bebasi kya hai

'azim' sab se bahut ehtiyat se milna

kahan samajhte hain ab log dosti kya hai