hum ahl-e-KHirad ki baaton se kuchh chain jahan mein pa na sake

ham ahl-e-ḳhirad kī bātoñ se kuchh chain jahāñ meñ pā na sake

aaj aisī pilā de ai saaqī tā-hashr hameñ hosh aa na sake

haa.il thī idhar ḳhuddārī-e-dil maane thā ġhurūr-e-husn udhar

mahrūmī-e-qismat kyā kahiye ham jā na sake vo aa na sake

tark-e-ulfat kī bāteñ to samjhā.īñ bahut nāseh ne hameñ

jiine kā sahārā kyā hogā ye baat zarā samjhā na sake

hai kufr dayār-e-ulfat meñ ġham ke hāthoñ nālāñ honā

vo nām-e-mohabbat hī kyoñ le jo taab ġhamoñ kī lā na sake

dil sang-diloñ se jab uljhe qīmat us kī baḌh jaatī hai

us shīshe kī hai qadr hī kyā jo patthar se Takrā na sake

dil kī dhaḌkan par hotā hai dhokā qadmoñ kī aahaT kā

āvāz to aatī hai paiham phir kyoñ vo abhī tak aa na sake

uljhī huī gutthī milne kī kis taur sulajhtī ai hamdam

kuchh ham se koshish ho na sakī kuchh zahmat vo farmā na sake

kyā kyā na sitam ham par Dhaa.e apnoñ ne karam ke parde meñ

phir bhī ham is kā shikva tak ik baar zabāñ par lā na sake

vo is se ziyāda kyā karte 'shaidā' terī ġham-ḳhvārī meñ

aañsū to bahā.e āñkhoñ se kuchh muñh se magar farmā na sake

hum ahl-e-KHirad ki baaton se kuchh chain jahan mein pa na sake

aaj aisi pila de ai saqi ta-hashr hamein hosh aa na sake

hail thi idhar KHuddari-e-dil mane tha ghurur-e-husn udhar

mahrumi-e-qismat kya kahiye hum ja na sake wo aa na sake

tark-e-ulfat ki baaten to samjhain bahut naseh ne hamein

jine ka sahaara kya hoga ye baat zara samjha na sake

hai kufr dayar-e-ulfat mein gham ke hathon nalan hona

wo nam-e-mohabbat hi kyon le jo tab ghamon ki la na sake

dil sang-dilon se jab uljhe qimat us ki baDh jati hai

us shishe ki hai qadr hi kya jo patthar se Takra na sake

dil ki dhaDkan par hota hai dhoka qadmon ki aahaT ka

aawaz to aati hai paiham phir kyon wo abhi tak aa na sake

uljhi hui gutthi milne ki kis taur sulajhti ai hamdam

kuchh hum se koshish ho na saki kuchh zahmat wo farma na sake

kya kya na sitam hum par Dhae apnon ne karam ke parde mein

phir bhi hum is ka shikwa tak ek bar zaban par la na sake

wo is se ziyaada kya karte 'shaida' teri gham-KHwari mein

aansu to bahae aankhon se kuchh munh se magar farma na sake