hum ahl-e-qalam ahl-e-wafa ahl-e-nazar hain

ham ahl-e-qalam ahl-e-vafā ahl-e-nazar haiñ

ham shahr meñ rahte hue bhī shahr-badar haiñ

dohrā.egī jin nāmoñ ko tārīḳh tumhārī

is shahr meñ un logoñ ke TuuTe hue ghar haiñ

raa.ij huā ye kaun sā qānūn ki phir ab

sannāTā hai bāzāroñ meñ sunsān nagar haiñ

aisā bhī nahīñ vaqt ke tevar ko na samjhūñ

is daur ke hālāt mire pesh-e-nazar haiñ

aa.e to koī dast-e-sitam ahl-e-junūñ tak

ham log bhī ab apnī jagah sīna-sipar haiñ

dam toḌne vaalī hai mire shahr kī zulmat

jo zulm ke aivān the vo zer-o-zabar haiñ

aise bhī junūñ-pesha haiñ kuchh log jahāñ meñ

muddat se jo manzil ke liye garm-e-safar haiñ

kyā daur hai jo dīda-e-bīnā nahīñ rakhte

vo log bhī shā.ista-e-ādāb-e-nazar haiñ

tauqīr-o-satā.ish hai yahāñ be-hunaroñ kī

mahrūm-e-satā.ish haiñ to bas ahl-e-hunar haiñ

hum ahl-e-qalam ahl-e-wafa ahl-e-nazar hain

hum shahr mein rahte hue bhi shahr-badar hain

dohraegi jin namon ko tariKH tumhaari

is shahr mein un logon ke TuTe hue ghar hain

raij hua ye kaun sa qanun ki phir ab

sannaTa hai bazaron mein sunsan nagar hain

aisa bhi nahin waqt ke tewar ko na samjhun

is daur ke haalat mere pesh-e-nazar hain

aae to koi dast-e-sitam ahl-e-junun tak

hum log bhi ab apni jagah sina-sipar hain

dam toDne wali hai mere shahr ki zulmat

jo zulm ke aiwan the wo zer-o-zabar hain

aise bhi junun-pesha hain kuchh log jahan mein

muddat se jo manzil ke liye garm-e-safar hain

kya daur hai jo dida-e-bina nahin rakhte

wo log bhi shaista-e-adab-e-nazar hain

tauqir-o-sataish hai yahan be-hunaron ki

mahrum-e-sataish hain to bas ahl-e-hunar hain