hum aise log tera dar talash karte hain

ham aise log tirā dar talāsh karte haiñ

phir us ke baa'd muqaddar talāsh karte haiñ

bhaTakte phirte haiñ duniyā meñ zindagī kī tarah

ba-vaqt-e-shām magar ghar talāsh karte haiñ

tumhāre saath mayassar thī har ḳhushī ham ko

tumhāre baa'd to aksar talāsh karte haiñ

bikhar sī jaatī hai ye zindagī jahāñ aksar

nazar ko aise hī manzar talāsh karte haiñ

talāsh meñ nahīñ hoñge ye kāmyāb kabhī

yahāñ jo tujh se bhī behtar talāsh karte haiñ

ye gaañv us kī judā.ī meñ hai bahut ġhamgīñ

so us ko shahr meñ jā kar talāsh karte haiñ

hum aise log tera dar talash karte hain

phir us ke ba'd muqaddar talash karte hain

bhaTakte phirte hain duniya mein zindagi ki tarah

ba-waqt-e-sham magar ghar talash karte hain

tumhaare sath mayassar thi har KHushi hum ko

tumhaare ba'd to aksar talash karte hain

bikhar si jati hai ye zindagi jahan aksar

nazar ko aise hi manzar talash karte hain

talash mein nahin honge ye kaamyab kabhi

yahan jo tujh se bhi behtar talash karte hain

ye ganw us ki judai mein hai bahut ghamgin

so us ko shahr mein ja kar talash karte hain