hum apna aap luTane kahan pe aa gae hain

ham apnā aap luTāne kahāñ pe aa ga.e haiñ

ḳhud apnī qadreñ gañvāne kahāñ pe aa ga.e haiñ

diloñ se dil mile rahte the ġhurbatoñ meñ miyāñ

shikam kī aag bujhāne kahāñ pe aa ga.e haiñ

likhā thā purkhoñ ne sadiyoñ meñ jin ko mehnat se

vo saare shajre jalāne kahāñ pe aa ga.e haiñ

jo chāhte the rahe apnī zaat tak har baat

vo apne zaḳhm dikhāne kahāñ pe aa ga.e haiñ

zamīñ pe apnī hī jal bujh ke ḳhaak ho jaate

ham apne dil ko jalāne kahāñ pe aa ga.e haiñ

ye vo jagah hai jahāñ jism tak nahīñ chhupte

ham apne sar ko chhupāne kahāñ pe aa ga.e haiñ

kisī bhī rishte kī izzat yahāñ nahīñ baaqī

miyāñ ye aaj zamāne kahāñ pe aa ga.e haiñ

ye sach hai ahd-e-taraqqī kiyā thā ḳhud se 'adīl'

magar ye ahd nibhāne kahāñ pe aa ga.e haiñ

hum apna aap luTane kahan pe aa gae hain

KHud apni qadren ganwane kahan pe aa gae hain

dilon se dil mile rahte the ghurbaton mein miyan

shikam ki aag bujhane kahan pe aa gae hain

likha tha purkhon ne sadiyon mein jin ko mehnat se

wo sare shajre jalane kahan pe aa gae hain

jo chahte the rahe apni zat tak har baat

wo apne zaKHm dikhane kahan pe aa gae hain

zamin pe apni hi jal bujh ke KHak ho jate

hum apne dil ko jalane kahan pe aa gae hain

ye wo jagah hai jahan jism tak nahin chhupte

hum apne sar ko chhupane kahan pe aa gae hain

kisi bhi rishte ki izzat yahan nahin baqi

miyan ye aaj zamane kahan pe aa gae hain

ye sach hai ahd-e-taraqqi kiya tha KHud se 'adil'

magar ye ahd nibhane kahan pe aa gae hain