hum apna dil hi nahin jaan nisar karte hain

ham apnā dil hī nahīñ jaañ nisār karte haiñ

kisī kī zaat pe jab e.atibār karte haiñ

qadam baḌhā diyā izn-e-safar mile na mile

vo log aur haiñ jo intizār karte haiñ

kabhī nigāh-e-karam bhī huī to ġhairoñ par

huzūr aap hameñ kab shumār karte haiñ

tamām ranj-o-alam muskurā ke sah lenā

ye kaam sirf mohabbat-shi.ār karte haiñ

farāz-e-dār-o-rasan se buland na.ara-e-haq

ham aise ahl-e-junūñ bār-bār karte haiñ

siyāh shab ke parastār haiñ jo duniyā meñ

vo āftāb ko kab sharmsār karte haiñ

zabān-e-'mīr' se āhang-e-'dāġh'-o-'fānī' se

ġhazal ke husn ko ham bā-vaqār karte haiñ

ye raqs-e-sarv-o-saman naġhma-e-nasīm-e-sahar

nafas nafas ko mire lāla-zār karte haiñ

nabī kī shaan pa jo uñgliyāñ uThāte haiñ

siyāh qalb haiñ sūraj pe vaar karte haiñ

naqīb-e-amn-o-mohabbat raheñ hamesha 'nadīm'

yahī ḳhudā se duā bār-bār karte haiñ

hum apna dil hi nahin jaan nisar karte hain

kisi ki zat pe jab eatibar karte hain

qadam baDha diya izn-e-safar mile na mile

wo log aur hain jo intizar karte hain

kabhi nigah-e-karam bhi hui to ghairon par

huzur aap hamein kab shumar karte hain

tamam ranj-o-alam muskura ke sah lena

ye kaam sirf mohabbat-shiar karte hain

faraaz-e-dar-o-rasan se buland nara-e-haq

hum aise ahl-e-junun bar-bar karte hain

siyah shab ke parastar hain jo duniya mein

wo aaftab ko kab sharmsar karte hain

zaban-e-'mir' se aahang-e-'dagh'-o-'fani' se

ghazal ke husn ko hum ba-waqar karte hain

ye raqs-e-sarw-o-saman naghma-e-nasim-e-sahar

nafas nafas ko mere lala-zar karte hain

nabi ki shan pa jo ungliyan uThate hain

siyah qalb hain suraj pe war karte hain

naqib-e-amn-o-mohabbat rahen hamesha 'nadim'

yahi KHuda se dua bar-bar karte hain