hum apne dil ki dhaDkan mein ek tamanna lae hain

ham apne dil kī dhaḌkan meñ ek tamannā laa.e haiñ

tujh se pyaar kī bāteñ karne duur kahīñ se aa.e haiñ

apnī āñkheñ rāhguzar haiñ apnā chehra patthar hai

tere va.adoñ ne bhī mujh ko kyā kyā ḳhvāb dikhā.e haiñ

tere āñchal kī chhāñv se shahr-e-junūñ kī dhuup talak

ḳhushbū ban kar bikhre ham ġhuncha ban kar murjhā.e haiñ

koī ujālā thā jo hamāre jism-o-jāñ se guzrā hai

kis ḳhurshed ne andhe ghar meñ apne aks uḌaa.e haiñ

taaza dhuup meñ jhiil kināre jab se tujh ko dekhā hai

'jāzib' ne ujle ujle rañgoñ ke ḳhvāb bichhā.e haiñ

hum apne dil ki dhaDkan mein ek tamanna lae hain

tujh se pyar ki baaten karne dur kahin se aae hain

apni aankhen rahguzar hain apna chehra patthar hai

tere wadon ne bhi mujh ko kya kya KHwab dikhae hain

tere aanchal ki chhanw se shahr-e-junun ki dhup talak

KHushbu ban kar bikhre hum ghuncha ban kar murjhae hain

koi ujala tha jo hamare jism-o-jaan se guzra hai

kis KHurshed ne andhe ghar mein apne aks uDae hain

taza dhup mein jhil kinare jab se tujh ko dekha hai

'jazib' ne ujle ujle rangon ke KHwab bichhae hain