hum apne KHun-e-dil se fasana banate hain

ham apne ḳhūn-e-dil se fasāna banāte haiñ

tanqīd kā vo phir bhī nishāna banāte haiñ

aatā hai jab bhī shahr meñ mausam fasād kā

ham ahl-e-ḳhair duur Thikāna banāte haiñ

hoñToñ pe tishnagī liye ham dauḌte rahe

ye ahl-e-mai-kada to bahāna banāte haiñ

tūl-e-shab-e-firāq kī jalvagarī na pūchh

tasbīh kā ham aañsū ko daana banāte haiñ

ahl-e-ḳhirad to vaqt ke dhāre meñ bah ga.e

ahl-e-junūñ to ek zamāna banāte haiñ

'rahbar' sar-e-niyāz jhukāne ke vāste

ham sang-e-dar ko apnā Thikāna banāte haiñ

hum apne KHun-e-dil se fasana banate hain

tanqid ka wo phir bhi nishana banate hain

aata hai jab bhi shahr mein mausam fasad ka

hum ahl-e-KHair dur Thikana banate hain

honTon pe tishnagi liye hum dauDte rahe

ye ahl-e-mai-kada to bahana banate hain

tul-e-shab-e-firaq ki jalwagari na puchh

tasbih ka hum aansu ko dana banate hain

ahl-e-KHirad to waqt ke dhaare mein bah gae

ahl-e-junun to ek zamana banate hain

'rahbar' sar-e-niyaz jhukane ke waste

hum sang-e-dar ko apna Thikana banate hain