hum apne sar pe to suraj uTha ke chalte hain

ham apne sar pe to sūraj uThā ke chalte haiñ

sunā hai barf ke ghar meñ bhī log jalte haiñ

ye kaisī rut hai ki nezoñ pe sar uchhalte haiñ

hamāre shahr ke bachchoñ ke dil dahalte haiñ

jo radium ke ujāle ruḳhoñ pe malte haiñ

vo apnī zaat se bāhar nahīñ nikalte haiñ

vo ham ki ḳhaar bhī ham se judā nahīñ hote

vo kaise log haiñ phūloñ ko bhī masalte haiñ

jo mujh pe guzre haiñ biite haiñ jin ko jhelā hai

vo hādse mire jām-e-ġhazal meñ Dhalte haiñ

falak se aag barastī to koī baat na thī

zamīn vaale zamīñ par hī zahr ugalte haiñ

vo fasl-e-gul na sahī ye ḳhizāñ sahī 'anvar'

kabhī to kāġhazī phūloñ ke din badalte haiñ

hum apne sar pe to suraj uTha ke chalte hain

suna hai barf ke ghar mein bhi log jalte hain

ye kaisi rut hai ki nezon pe sar uchhalte hain

hamare shahr ke bachchon ke dil dahalte hain

jo radium ke ujale ruKHon pe malte hain

wo apni zat se bahar nahin nikalte hain

wo hum ki KHar bhi hum se juda nahin hote

wo kaise log hain phulon ko bhi masalte hain

jo mujh pe guzre hain bite hain jin ko jhela hai

wo hadse mere jam-e-ghazal mein Dhalte hain

falak se aag barasti to koi baat na thi

zamin wale zamin par hi zahr ugalte hain

wo fasl-e-gul na sahi ye KHizan sahi 'anwar'

kabhi to kaghazi phulon ke din badalte hain