hum azal se an-chahe zabton mein rahte hain

ham azal se an-chāhe zābtoñ meñ rahte haiñ

zindagī kā lālach hai qātiloñ meñ rahte haiñ

ham 'ajab musāfir haiñ rāstoñ se Darte haiñ

manziloñ kī ḳhvāhish hai aur gharoñ meñ rahte haiñ

aaj bhī rihā.ī ke kuchh bache-khuche jazbe

ham shikast ḳhurda ham jayyadoñ meñ rahte haiñ

DhūñDte haiñ apne kuchh gum-shuda irādoñ ko

ham ki apne ḳhvāboñ kī kirchiyoñ meñ rahte haiñ

kyoñ bichhaḌne vāloñ ke 'aks mar nahīñ sakte

kyoñ ye ashk āñkhoñ ke ā.inoñ meñ rahte haiñ

sar uThā ke chalne kā shauq ho jinheñ 'aḳhtar'

vo to dāstānoñ yā maqtaloñ meñ rahte haiñ

hum azal se an-chahe zabton mein rahte hain

zindagi ka lalach hai qatilon mein rahte hain

hum 'ajab musafir hain raston se Darte hain

manzilon ki KHwahish hai aur gharon mein rahte hain

aaj bhi rihai ke kuchh bache-khuche jazbe

hum shikast KHurda hum jayyadon mein rahte hain

DhunDte hain apne kuchh gum-shuda iradon ko

hum ki apne KHwabon ki kirchiyon mein rahte hain

kyon bichhaDne walon ke 'aks mar nahin sakte

kyon ye ashk aankhon ke aainon mein rahte hain

sar uTha ke chalne ka shauq ho jinhen 'aKHtar'

wo to dastanon ya maqtalon mein rahte hain