hum aziz is qadar ab ji ka ziyan rakhte hain

ham aziiz is qadar ab jī kā ziyāñ rakhte haiñ

dost bhī rakhte haiñ to dushman-e-jāñ rakhte haiñ

haañ vahī log jo dil-dāda-e-fasl-e-gul the

haiñ vo bezār ke armān-e-ḳhizāñ rakhte haiñ

zehn afsurda huā aisā ki a.asāb haiñ shal

varna ham nām-e-ḳhudā qalb javāñ rakhte haiñ

saa.e se karte haiñ ham apne kaḌī dhuup meñ oT

aañkh kī tīrgī meñ nūr-fishāñ rakhte haiñ

lab-e-mahbūb ho paimāna-e-sāfī ho ki zahr

jism jal uThtā hai ham hoñT jahāñ rakhte haiñ

ham-safar koī jahāñ chhoḌ ke chal detā hai

usī manzil kā laqab sang-e-girāñ rakhte haiñ

jis jagah dil thā vahāñ hasrat-e-dil baaqī hai

jis jagah zaḳhm thā ab sirf nishāñ rakhte haiñ

laḌkhaḌā jaate haiñ mai-ḳhāna ho jaise duniyā

laakh ham paañv sañbhal kar bhī yahāñ rakhte haiñ

un kī duzdīda nigāhoñ ko duā do 'shaukat'

varna ma.alūm jo ham tab-e-ravāñ rakhte haiñ

hum aziz is qadar ab ji ka ziyan rakhte hain

dost bhi rakhte hain to dushman-e-jaan rakhte hain

han wahi log jo dil-dada-e-fasl-e-gul the

hain wo bezar ke arman-e-KHizan rakhte hain

zehn afsurda hua aisa ki aasab hain shal

warna hum nam-e-KHuda qalb jawan rakhte hain

sae se karte hain hum apne kaDi dhup mein oT

aankh ki tirgi mein nur-fishan rakhte hain

lab-e-mahbub ho paimana-e-safi ho ki zahr

jism jal uThta hai hum honT jahan rakhte hain

ham-safar koi jahan chhoD ke chal deta hai

usi manzil ka laqab sang-e-giran rakhte hain

jis jagah dil tha wahan hasrat-e-dil baqi hai

jis jagah zaKHm tha ab sirf nishan rakhte hain

laDkhaDa jate hain mai-KHana ho jaise duniya

lakh hum panw sanbhal kar bhi yahan rakhte hain

un ki duzdida nigahon ko dua do 'shaukat'

warna malum jo hum tab-e-rawan rakhte hain