hum bayaban se gulistan ki taraf aa na sake

ham bayābāñ se gulistāñ kī taraf aa na sake

raġhbat-e-ḳhār rahī phuul hameñ bhā na sake

aaj tak rāh-e-haqīqat meñ rahe mere qadam

mujh ko badle hue hālāt bhī bahkā na sake

yuuñ to kahne ko numā.inda haiñ aslāf ke ham

un ke qadmoñ kī magar gard ko bhī pā na sake

in bahāroñ se ḳhudā duur hamesha rakkhe

jin se apne dil-e-bargashta ko bahlā na sake

dukh bhare din hoñ ki hoñ ġham kī bhayānak rāteñ

aaj tak ham kisī māhaul meñ ghabrā na sake

kaise insān se insān mileñge dil se

apne zehnoñ se jab auhām ke but Dhā na sake

aise jiine se to hāsil nahīñ kuchh faiz 'kamāl'

raushnī ban ke añdheroñ pe agar chhā na sake

hum bayaban se gulistan ki taraf aa na sake

raghbat-e-KHar rahi phul hamein bha na sake

aaj tak rah-e-haqiqat mein rahe mere qadam

mujh ko badle hue haalat bhi bahka na sake

yun to kahne ko numainda hain aslaf ke hum

un ke qadmon ki magar gard ko bhi pa na sake

in bahaaron se KHuda dur hamesha rakkhe

jin se apne dil-e-bargashta ko bahla na sake

dukh bhare din hon ki hon gham ki bhayanak raaten

aaj tak hum kisi mahaul mein ghabra na sake

kaise insan se insan milenge dil se

apne zehnon se jab auham ke but Dha na sake

aise jine se to hasil nahin kuchh faiz 'kamal'

raushni ban ke andheron pe agar chha na sake