hum bhi ek zamane tak hadson se khele hain

ham bhī ik zamāne tak hādsoñ se khele haiñ

ġham uThā.e haiñ paiham dard ham ne jhele haiñ

uf ye dasht-paimā.ī uf ye ābla-pā.ī

jāda-e-mohabbat meñ kis qadar jhamele haiñ

tum se dil lagāne kī ye sazā milī mujh ko

ranj-o-ġham kī yūrish hai hasratoñ ke rele haiñ

do diloñ ko aa.e to kis tarah qarār aa.e

tum vahāñ akelī ho ham yahāñ akele haiñ

dekh kar mirā chehra ab nazar churātī ho

yaad hogā bachpan meñ donoñ saath khele haiñ

ik gharauñdā miTTī kā jo kabhī banāyā thā

aaj mere hāthoñ meñ us ke chañd Dhele haiñ

ruuh mutma.in ho aur dil ho dard se ḳhālī

phir to jis taraf dekho zindagī ke mele haiñ

hum bhi ek zamane tak hadson se khele hain

gham uThae hain paiham dard hum ne jhele hain

uf ye dasht-paimai uf ye aabla-pai

jada-e-mohabbat mein kis qadar jhamele hain

tum se dil lagane ki ye saza mili mujh ko

ranj-o-gham ki yurish hai hasraton ke rele hain

do dilon ko aae to kis tarah qarar aae

tum wahan akeli ho hum yahan akele hain

dekh kar mera chehra ab nazar churaati ho

yaad hoga bachpan mein donon sath khele hain

ek gharaunda miTTi ka jo kabhi banaya tha

aaj mere hathon mein us ke chand Dhele hain

ruh mutmain ho aur dil ho dard se KHali

phir to jis taraf dekho zindagi ke mele hain