hum bhi kahan chaman ki hifazat ko aa gae

ham bhī kahāñ chaman kī hifāzat ko aa ga.e

ḳhud bāġhbāñ hamārī adāvat ko aa ga.e

bāzār phailne jo lagā ghar meñ har taraf

rishte sabhī lapak ke tijārat ko aa ga.e

har vaqt aib sab ke gināne meñ ham rahe

phir ek roz ham hī sharāfat ko aa ga.e

avval harām-ḳhor sabhī apne mulk meñ

aalī janāb ho ke qayādat ko aa ga.e

kyoñ na siyāh rāteñ ujāloñ se hārtīñ

jab sab diye havā se baġhāvat ko aa ga.e

pur-lutf zindagī ke liye thā yahī bahut

donoñ zarā zarā sā mohabbat ko aa ga.e

mil kar sabhī ne pahle to bīmār kar diyā

phir saare dost merī ayādat ko aa ga.e

hum bhi kahan chaman ki hifazat ko aa gae

KHud baghban hamari adawat ko aa gae

bazar phailne jo laga ghar mein har taraf

rishte sabhi lapak ke tijarat ko aa gae

har waqt aib sab ke ginane mein hum rahe

phir ek roz hum hi sharafat ko aa gae

awwal haram-KHor sabhi apne mulk mein

aali janab ho ke qayaadat ko aa gae

kyon na siyah raaten ujalon se haartin

jab sab diye hawa se baghawat ko aa gae

pur-lutf zindagi ke liye tha yahi bahut

donon zara zara sa mohabbat ko aa gae

mil kar sabhi ne pahle to bimar kar diya

phir sare dost meri ayaadat ko aa gae