hum chaTanon ki tarah sahil pe Dhaale jaenge

ham chaTānoñ kī tarah sāhil pe Dhāle jā.eñge

phir hameñ sailāb ke dhāre bahā le jā.eñge

aisī rut aa.ī añdhere ban ga.e mimbar ke but

gumbad-o-mehrāb kyā jugnū bachā le jā.eñge

pahle sab ta.amīr karvā.eñge kāġhaz ke makāñ

phir havā ke ruḳh pe añgāre uchhāle jā.eñge

ham vafādāroñ meñ haiñ us ke magar mashkūk haiñ

ik na ik din us kī mahfil se nikāle jā.eñge

jañg meñ le jā.eñge sarhad pe sab tīr-o-tafang

ham to apne saath miTTī kī duā le jā.eñge

shahr ko tahzīb ke jhoñkoñ ne nañgā kar diyā

gaañv ke sar kā dupaTTa bhī uḌā le jā.eñge

dāstān-e-ishq ko 'bekal' na de gītoñ kā ruup

dost haiñ bebāk sab lahje churā le jā.eñge

hum chaTanon ki tarah sahil pe Dhaale jaenge

phir hamein sailab ke dhaare baha le jaenge

aisi rut aai andhere ban gae mimbar ke but

gumbad-o-mehrab kya jugnu bacha le jaenge

pahle sab tamir karwaenge kaghaz ke makan

phir hawa ke ruKH pe angare uchhaale jaenge

hum wafadaron mein hain us ke magar mashkuk hain

ek na ek din us ki mahfil se nikale jaenge

jang mein le jaenge sarhad pe sab tir-o-tafang

hum to apne sath miTTi ki dua le jaenge

shahr ko tahzib ke jhonkon ne nanga kar diya

ganw ke sar ka dupaTTa bhi uDa le jaenge

dastan-e-ishq ko 'bekal' na de giton ka rup

dost hain bebak sab lahje chura le jaenge