hum dard-e-mohabbat ka mudawa nahin karte

ham dard-e-mohabbat kā mudāvā nahīñ karte

kuchh bhī ho magar arz-e-tamannā nahīñ karte

ḳhud zaat pe apnī jo bharosā nahīñ karte

duniyā meñ kabhī naam vo paidā nahīñ karte

manzil kī taraf baḌhte haiñ manzil ke musāfir

ho jaan kā ḳhatra bhī to parvā nahīñ karte

jo rind haiñ maiḳhāne ke ādāb se vāqif

ḳhum bhī jo chaḌhā jaa.eñ to bahkā nahīñ karte

dekhā na kabhī husn ko gustāḳh-nazar se

ham ḳhvāb ke aalam meñ bhī aisā nahīñ karte

jo izzat-o-ḳhuddārī ke haiñ qadr-shanāsā

vo izzat-o-ḳhuddārī kā saudā nahīñ karte

ham dekhte haiñ ek nazar us ko sar-e-ām

chhup-chhup ke kabhī husn ko dekhā nahīñ karte

vo log jo haiñ vāqif-e-taqdīs-e-ġham-o-dard

barbād ġham-o-dard kī duniyā nahīñ karte

hai apne ta.iiñ hurmat-e-fan jaan se baḌh kar

ham hurmat-e-fan ko kabhī rusvā nahīñ karte

'maġhmūm jinheñ vāsta hai naqd-o-nazar se

tārīf kisī kī bhī vo bejā nahīñ karte

hum dard-e-mohabbat ka mudawa nahin karte

kuchh bhi ho magar arz-e-tamanna nahin karte

KHud zat pe apni jo bharosa nahin karte

duniya mein kabhi nam wo paida nahin karte

manzil ki taraf baDhte hain manzil ke musafir

ho jaan ka KHatra bhi to parwa nahin karte

jo rind hain maiKHane ke aadab se waqif

KHum bhi jo chaDha jaen to bahka nahin karte

dekha na kabhi husn ko gustaKH-nazar se

hum KHwab ke aalam mein bhi aisa nahin karte

jo izzat-o-KHuddari ke hain qadr-shanasa

wo izzat-o-KHuddari ka sauda nahin karte

hum dekhte hain ek nazar us ko sar-e-am

chhup-chhup ke kabhi husn ko dekha nahin karte

wo log jo hain waqif-e-taqdis-e-gham-o-dard

barbaad gham-o-dard ki duniya nahin karte

hai apne tain hurmat-e-fan jaan se baDh kar

hum hurmat-e-fan ko kabhi ruswa nahin karte

'maghmum jinhen wasta hai naqd-o-nazar se

tarif kisi ki bhi wo beja nahin karte