hum dekhte hain unki taraf bar bar kyun

ham dekhte haiñ un kī taraf baar baar kyuuñ

apnī nazar pe ham ko nahīñ iḳhtiyār kyuuñ

vo mujh se pūchhte haiñ ki ho be-qarār kyuuñ

maiñ un se pūchhtā huuñ ki ho trahdār kyuuñ

dariyā bahā rahī tū ai chashm-e-zār kyuuñ

dam bhar bhī TūTtā nahīñ ashkoñ kā taar kyuuñ

tum mujh pe Dhā rahe ho sitam baar baar kyuuñ

āḳhir rulā rahe ho mujhe zaar zaar kyuuñ

pazhmurda hote jaate haiñ gulhā-e-dāġh-e-dil

aatī nahīñ chaman meñ hamāre bahār kyuuñ

kyā phūñk kar rahegī mire āshiyāne ko

bijlī lapak rahī hai idhar baar baar kyuuñ

va.ada hī va.ada thā na vo aa.e na ā.eñge

ai chashm-e-ārzū hai tujhe intizār kyuuñ

apnī nazar se pūchhiye hāl-e-dil-e-hazīñ

be-iḳhtiyār kyuuñ hai nahīñ iḳhtiyār kyuuñ

jab terī rahmatoñ kā nahīñ hai koī shumār

isyāñ kā mere hotā hai yārab shumār kyuuñ

kyā haiñ kisī ke gesu-e-mushkīñ khule hue

hai gulshan-e-jahāñ kī fazā itr-bār kyuuñ

apnī tarah mujhe bhī karegī tamām kyā

taḌpā rahī hai mujh ko shab-e-intizār kyuuñ

haiñ yuuñ to trahdār zamāne meñ aur bhī

lekin hai aap hī pe zamāna nisār kyuuñ

zaḳhmī haiñ donoñ kyā tire tīr-e-nigāh ke

dil meñ ḳhalish hai aur jigar dāġh-dār kyuuñ

'sābir' kī zindagī meñ to pūchhā na aap ne

marne ke ba.ad pūchh rahe haiñ mazār kyuuñ

hum dekhte hain un ki taraf bar bar kyun

apni nazar pe hum ko nahin iKHtiyar kyun

wo mujh se puchhte hain ki ho be-qarar kyun

main un se puchhta hun ki ho trahdar kyun

dariya baha rahi tu ai chashm-e-zar kyun

dam bhar bhi TuTta nahin ashkon ka tar kyun

tum mujh pe Dha rahe ho sitam bar bar kyun

aaKHir rula rahe ho mujhe zar zar kyun

pazhmurda hote jate hain gulha-e-dagh-e-dil

aati nahin chaman mein hamare bahaar kyun

kya phunk kar rahegi mere aashiyane ko

bijli lapak rahi hai idhar bar bar kyun

wada hi wada tha na wo aae na aaenge

ai chashm-e-arzu hai tujhe intizar kyun

apni nazar se puchhiye haal-e-dil-e-hazin

be-iKHtiyar kyun hai nahin iKHtiyar kyun

jab teri rahmaton ka nahin hai koi shumar

isyan ka mere hota hai yarab shumar kyun

kya hain kisi ke gesu-e-mushkin khule hue

hai gulshan-e-jahan ki faza itr-bar kyun

apni tarah mujhe bhi karegi tamam kya

taDpa rahi hai mujh ko shab-e-intizar kyun

hain yun to trahdar zamane mein aur bhi

lekin hai aap hi pe zamana nisar kyun

zaKHmi hain donon kya tere tir-e-nigah ke

dil mein KHalish hai aur jigar dagh-dar kyun

'sabir' ki zindagi mein to puchha na aap ne

marne ke baad puchh rahe hain mazar kyun