hum gardish-e-dauran ke sitam dekh rahe hain

ham gardish-e-daurāñ ke sitam dekh rahe haiñ

be-chārgī-e-ahl-e-karam dekh rahe haiñ

ham dil pe sahe jaate haiñ har tīr-e-jafā ko

hai kis kā jigar dekhe jo ham dekh rahe haiñ

hai ye to yaqīñ badlegā andāz-e-zamāna

filhāl to ham shiddat-e-ġham dekh rahe haiñ

īsār-o-muravvat haiñ jo tum dekh rahe ho

be-dād-o-taġhāful haiñ jo ham dekh rahe haiñ

hañs hañs ke sahe jaate haiñ har tāza-sitam ko

ham shiddat-e-ālām kā dukh dekh rahe haiñ

har halqa-e-zanjīr ko yuuñ chūmā nazar ne

ham jaise tirī zulf ke ḳham dekh rahe haiñ

baiThe haiñ 'nadīm' ab bhī liye hasrat-e-dīdār

phir sū-e-dar-o-bām sanam dekh rahe haiñ

hum gardish-e-dauran ke sitam dekh rahe hain

be-chaargi-e-ahl-e-karam dekh rahe hain

hum dil pe sahe jate hain har tir-e-jafa ko

hai kis ka jigar dekhe jo hum dekh rahe hain

hai ye to yaqin badlega andaz-e-zamana

filhaal to hum shiddat-e-gham dekh rahe hain

isar-o-murawwat hain jo tum dekh rahe ho

be-dad-o-taghaful hain jo hum dekh rahe hain

hans hans ke sahe jate hain har taza-sitam ko

hum shiddat-e-alam ka dukh dekh rahe hain

har halqa-e-zanjir ko yun chuma nazar ne

hum jaise teri zulf ke KHam dekh rahe hain

baiThe hain 'nadim' ab bhi liye hasrat-e-didar

phir su-e-dar-o-baam sanam dekh rahe hain