hum hain mushtaq-laqa hum ko wo Talen kyon kar

ham haiñ mushtāq-laqā ham ko vo Tāleñ kyoñ kar

aur Tāleñ bhī to ham dil ko sañbhāleñ kyoñ kar

zulm karne ko vo kahte haiñ barābar ham se

fikr ye hai ki ise bazm se Tāleñ kyoñ kar

har ghaḌī zulm-o-sitam kā unheñ rahtā hai ḳhayāl

apne 'āshiq kī tamannā vo nikāleñ kyoñ kar

sharm aatī hai unheñ kar ke jafā hazrat-e-dil

sāmne aap ke vo nām-e-vafā leñ kyoñ kar

naala karte haiñ jo 'āshiq to vo hote haiñ ḳhafā

muñh se ab harf-e-tamannā ye nikāleñ kyoñ kar

rafta-rafta sitam-e-charḳh ke 'aadī hoñge

yak-ba-yak bār-e-garāñ sar pe uThā leñ kyoñ kar

dil liyā thā mirā bachpan meñ usī din ke liye

phir chaleñ aap javāñ ho ke na chāleñ kyoñ kar

us ke kūche se nikalnā to hai āsāñ apnā

lekin armāñ dil-e-shaidā se nikāleñ kyoñ kar

naaz uThāne ko to 'hāmid' bhī vahāñ jā baiThe

ab sañbhaltā nahīñ dil un se sañbhāleñ kyoñ kar

hum hain mushtaq-laqa hum ko wo Talen kyon kar

aur Talen bhi to hum dil ko sanbhaalen kyon kar

zulm karne ko wo kahte hain barabar hum se

fikr ye hai ki ise bazm se Talen kyon kar

har ghaDi zulm-o-sitam ka unhen rahta hai KHayal

apne 'ashiq ki tamanna wo nikalen kyon kar

sharm aati hai unhen kar ke jafa hazrat-e-dil

samne aap ke wo nam-e-wafa len kyon kar

nala karte hain jo 'ashiq to wo hote hain KHafa

munh se ab harf-e-tamanna ye nikalen kyon kar

rafta-rafta sitam-e-charKH ke 'adi honge

yak-ba-yak bar-e-garan sar pe uTha len kyon kar

dil liya tha mera bachpan mein usi din ke liye

phir chalen aap jawan ho ke na chaalen kyon kar

us ke kuche se nikalna to hai aasan apna

lekin arman dil-e-shaida se nikalen kyon kar

naz uThane ko to 'hamid' bhi wahan ja baiThe

ab sanbhalta nahin dil un se sanbhaalen kyon kar