hum hue hon ki dil hua barbaad

ham hue hoñ ki dil huā barbād

ishq ne sab ko kar diyā barbād

ham se milte hue bhī hairat hai

vaqt hotā hai aap kā barbād

ye parī-chehra log kyā samjheñ

kaun kis vaqt ho gayā barbād

qadr maañ baap kī na kī jis ne

dekhnā us ko vo huā barbād

shauq is meñ bahut zarūrī hai

ho na jaa.e kahīñ duā barbād

aah lenā na tum dukhe dil kī

kar na de tum ko badduā barbād

aaḌe vaqtoñ meñ kaam aa.egā

paisa mat karnā haath kā barbād

va.ada kar ke bhī vo nahīñ aaya

ho gayā merā rat-jagā barbād

kis kī bātoñ meñ aa ga.e 'zāhid'

kaun tum ko ye kar gayā barbād

hum hue hon ki dil hua barbaad

ishq ne sab ko kar diya barbaad

hum se milte hue bhi hairat hai

waqt hota hai aap ka barbaad

ye pari-chehra log kya samjhen

kaun kis waqt ho gaya barbaad

qadr man bap ki na ki jis ne

dekhna us ko wo hua barbaad

shauq is mein bahut zaruri hai

ho na jae kahin dua barbaad

aah lena na tum dukhe dil ki

kar na de tum ko baddua barbaad

aaDe waqton mein kaam aaega

paisa mat karna hath ka barbaad

wada kar ke bhi wo nahin aaya

ho gaya mera rat-jaga barbaad

kis ki baaton mein aa gae 'zahid'

kaun tum ko ye kar gaya barbaad