hum hue taswir ab pahla sa wo aalam kahan

ham hue tasvīr ab pahlā sā vo aalam kahāñ

rañg haiñ sab pairahan meñ kho ga.e haiñ ham kahāñ

muzmahil hai sub.h kā sho.ala dhuāñ hai dasht par

dekhnā hai uḌ ke jaatī hai magar shabnam kahāñ

dast-e-qātil ke liye hoñToñ pe ab bhī marhabā

ḳhūn-e-ahl-e-dil kī ḳhātir sīna-e-mātam kahāñ

dāman-e-dil meñ sameTe haiñ abhī tūfāñ ka.ī

sail-e-ashk-o-nāla-e-ġham ho ga.e haiñ kam kahāñ

dil dhaḌaktā hai har ik aahaT pe ahl-e-hijr kā

jānte haiñ vo ki aa.egā koī is dam kahāñ

uḌ ke aatā hai ġhubār-e-rahguzar āñkhoñ meñ phir

DhūñDhtā huuñ kho gayā hai dīda-pur-nam kahāñ

hum hue taswir ab pahla sa wo aalam kahan

rang hain sab pairahan mein kho gae hain hum kahan

muzmahil hai subh ka shoala dhuan hai dasht par

dekhna hai uD ke jati hai magar shabnam kahan

dast-e-qatil ke liye honTon pe ab bhi marhaba

KHun-e-ahl-e-dil ki KHatir sina-e-matam kahan

daman-e-dil mein sameTe hain abhi tufan kai

sail-e-ashk-o-nala-e-gham ho gae hain kam kahan

dil dhaDakta hai har ek aahaT pe ahl-e-hijr ka

jaante hain wo ki aaega koi is dam kahan

uD ke aata hai ghubar-e-rahguzar aankhon mein phir

DhunDhta hun kho gaya hai dida-pur-nam kahan