hum intiha-e-jaur-o-sitam dekhte rahe

ham intihā-e-jaur-o-sitam dekhte rahe

ya.anī ki un ke lutf-o-karam dekhte rahe

nāzāñ thā apnī parda-nashīnī pe jo bahut

chashm-e-ḳhayāl se use ham dekhte rahe

jā pahuñche rind arsh pe sāġhar ko chuum kar

jo farsh par the ranj-o-alam dekhte rahe

hosh-o-ḳhirad meñ ishq kī manzil na mil sakī

ham rahbaroñ ke naqsh-e-qadam dekhte rahe

uljheñge hādsāt se azm-e-javāñ ke saath

ab tak to hādsāt ko ham dekhte rahe

ai 'auj' apnā zauq-e-nazar hai ki der tak

dīvāna-vār zulf kā ḳham dekhte rahe

hum intiha-e-jaur-o-sitam dekhte rahe

yani ki un ke lutf-o-karam dekhte rahe

nazan tha apni parda-nashini pe jo bahut

chashm-e-KHayal se use hum dekhte rahe

ja pahunche rind arsh pe saghar ko chum kar

jo farsh par the ranj-o-alam dekhte rahe

hosh-o-KHirad mein ishq ki manzil na mil saki

hum rahbaron ke naqsh-e-qadam dekhte rahe

uljhenge hadsat se azm-e-jawan ke sath

ab tak to hadsat ko hum dekhte rahe

ai 'auj' apna zauq-e-nazar hai ki der tak

diwana-war zulf ka KHam dekhte rahe