hum itna bandagi mein kho chuke hain

ham itnā bandagī meñ kho chuke haiñ

ḳhudā se baat tak karne lage haiñ

khilaune sach meñ mahñge ho ga.e haiñ

yahāñ sab dil se mere khelte haiñ

vabā phailī hai aisī āsmāñ meñ

parinde sab zamīñ par aa gire haiñ

sukūñ kī aas meñ sahrā meñ aaya

yahāñ bhī peḌ sab rūThe khaḌe haiñ

achānak aa kisī shab dekh aa kar

baḌe mash.hūr apne ratjage haiñ

koī duujā nahīñ nazdīk mere

mire jo rābte haiñ aap se haiñ

mizāj apnā jahāñ se muḳhtalif hai

bahut kam logoñ se ham bolte haiñ

mirā ronā bhī 'sohil' mo.ajiza hai

ḳhizāñ meñ phuul kuchh khilne lage haiñ

hum itna bandagi mein kho chuke hain

KHuda se baat tak karne lage hain

khilaune sach mein mahnge ho gae hain

yahan sab dil se mere khelte hain

waba phaili hai aisi aasman mein

parinde sab zamin par aa gire hain

sukun ki aas mein sahra mein aaya

yahan bhi peD sab ruThe khaDe hain

achanak aa kisi shab dekh aa kar

baDe mashhur apne ratjage hain

koi duja nahin nazdik mere

mere jo rabte hain aap se hain

mizaj apna jahan se muKHtalif hai

bahut kam logon se hum bolte hain

mera rona bhi 'sohil' moajiza hai

KHizan mein phul kuchh khilne lage hain