hum itni ehtiyat se hain zindagi ke sath

ham itnī ehtiyāt se haiñ zindagī ke saath

kaTtī ho jaise 'umr kisī ajnabī ke saath

do gaam saath de ke mohabbat kī raah meñ

achchhā mazāq tum ne kiyā zindagī ke saath

pī leñge ham to shauq se ye zahr-e-tanz bhī

ronā paḌe na tum ko kisī din hañsī ke saath

māñge hue charāġh kī lau le ke kyā kareñ

apnī to 'umr kaT hī ga.ī tīrgī ke saath

ye aur baat hai ki ḳhushī chhīn lī ga.ī

ham ko shu'ūr-e-ġham bhī milā āgahī ke saath

sajde na hoñ qubūl magar ye to ġham na ho

sajdoñ kī aabrū bhī ga.ī bandagī ke saath

rāheñ judā judā hoñ to kuchh ġham na kījiye

ham 'ālam-e-ḳhayāl meñ haiñ aap hī ke saath

jis se nazar milā ke kabhī guftugū na kī

ik rabt-e-ḳhās ham ko rahā hai usī ke saath

phūloñ kī zindagī ko baḌhāne ke vāste

gulshan meñ ghūmtī hai 'sabā' sādgī ke saath

hum itni ehtiyat se hain zindagi ke sath

kaTti ho jaise 'umr kisi ajnabi ke sath

do gam sath de ke mohabbat ki rah mein

achchha mazaq tum ne kiya zindagi ke sath

pi lenge hum to shauq se ye zahr-e-tanz bhi

rona paDe na tum ko kisi din hansi ke sath

mange hue charagh ki lau le ke kya karen

apni to 'umr kaT hi gai tirgi ke sath

ye aur baat hai ki KHushi chhin li gai

hum ko shu'ur-e-gham bhi mila aagahi ke sath

sajde na hon qubul magar ye to gham na ho

sajdon ki aabru bhi gai bandagi ke sath

rahen juda juda hon to kuchh gham na kijiye

hum 'alam-e-KHayal mein hain aap hi ke sath

jis se nazar mila ke kabhi guftugu na ki

ek rabt-e-KHas hum ko raha hai usi ke sath

phulon ki zindagi ko baDhane ke waste

gulshan mein ghumti hai 'saba' sadgi ke sath