hum jaana chahte the jidhar bhi nahin gae

ham jaanā chāhte the jidhar bhī nahīñ ga.e

aur intihā to ye hai ki ghar bhī nahīñ ga.e

vo ḳhvāb jaane kaise ḳharābe meñ gum hue

is paar bhī nahīñ haiñ idhar bhī nahīñ ga.e

sāhib tumheñ ḳhabar hī kahāñ thī ki ham bhī haiñ

vaise to ab bhī haiñ koī mar bhī nahīñ ga.e

bārish huī to hai magar itnī ki ye zarūf

ḳhālī nahīñ rahe haiñ to bhar bhī nahīñ ga.e

'ādil' zamīn-e-dil se zamāne ḳhayāl ke

guzre kuchh is tarah ki guzar bhī nahīñ ga.e

hum jaana chahte the jidhar bhi nahin gae

aur intiha to ye hai ki ghar bhi nahin gae

wo KHwab jaane kaise KHarabe mein gum hue

is par bhi nahin hain idhar bhi nahin gae

sahib tumhein KHabar hi kahan thi ki hum bhi hain

waise to ab bhi hain koi mar bhi nahin gae

barish hui to hai magar itni ki ye zaruf

KHali nahin rahe hain to bhar bhi nahin gae

'adil' zamin-e-dil se zamane KHayal ke

guzre kuchh is tarah ki guzar bhi nahin gae