hum jaison ka KHayal kisi ne nahin kiya

ham jaisoñ kā ḳhayāl kisī ne nahīñ kiyā

is baat kā malāl kisī ne nahīñ kiyā

hotī rahī haiñ jin kī taraf se 'ināyateñ

darvesh ko nihāl kisī ne nahīñ kiyā

sab log muntazir haiñ ki darvāza kuchh kahe

dīvār se savāl kisī ne nahīñ kiyā

tasḳhīr to kiyā hai kisī ke jamāl ne

pāband-e-ḳhadd-o-ḳhāl kisī ne nahīñ kiyā

be-misl kī misāl agar dī to ham ne dī

ye kār-e-be-misāl kisī ne nahīñ kiyā

chāra-garān-e-zaḳhm ko phir bhī mirā salām

hālāñki indimāl kisī ne nahīñ kiyā

'ikrām' shām-e-hijr guzarne ke bāvajūd

sharminda-e-visāl kisī ne nahīñ kiyā

hum jaison ka KHayal kisi ne nahin kiya

is baat ka malal kisi ne nahin kiya

hoti rahi hain jin ki taraf se 'inayaten

darwesh ko nihaal kisi ne nahin kiya

sab log muntazir hain ki darwaza kuchh kahe

diwar se sawal kisi ne nahin kiya

tasKHir to kiya hai kisi ke jamal ne

paband-e-KHadd-o-KHal kisi ne nahin kiya

be-misl ki misal agar di to hum ne di

ye kar-e-be-misal kisi ne nahin kiya

chaara-garan-e-zaKHm ko phir bhi mera salam

haalanki indimal kisi ne nahin kiya

'ikram' sham-e-hijr guzarne ke bawajud

sharminda-e-visal kisi ne nahin kiya