hum jal rahe the aur ba-zahir nishan na tha

ham jal rahe the aur ba-zāhir nishāñ na thā

dil kī lagī vo aag thī jis meñ dhuāñ na thā

rokā thā mujh ko merī ḳhudī ke hijāb ne

dekhā to un ke dar pe koī pāsbāñ na thā

mauhūm jalva thā tire aks-e-ḳhayāl kā

badlā ḳhayāl tū ne to saarā jahāñ na thā

vo kar rahe the mujh ko vafāoñ meñ puḳhta-kār

mashq-e-sitam hai madd-e-nazar imtihāñ na thā

parvāz-e-fikr bhī rahī zauq-e-nazar ke saath

pābandī-e-qafas se mujhe kuchh ziyāñ na thā

thā e.atibār-e-naqs-o-kamāl-e-nigāh-e-shauq

vo jalva jo ayaañ bhī nahīñ thā nihāñ na thā

ham ko to iltifāt-e-karam kā rahā ḳhayāl

varna zabāñ pe harf-e-tamannā girāñ na thā

bijlī chamak chamak ke nazar Dāltī rahī

girtī kahāñ chaman meñ mirā āshiyāñ na thā

thī zindagī muhāl ġham-e-ishq ke baġhair

jo ġham diyā gayā thā ġham-e-jāvedāñ na thā

inkār karte kyā ki zalūm-o-jahūl the

ye to nahīñ ki bār-e-amānat girāñ na thā

'shākir' huā vafā-e-musalsal se kāmyāb

āġhāz-e-ishq meñ to vo kuchh mehrbāñ na thā

hum jal rahe the aur ba-zahir nishan na tha

dil ki lagi wo aag thi jis mein dhuan na tha

roka tha mujh ko meri KHudi ke hijab ne

dekha to un ke dar pe koi pasban na tha

mauhum jalwa tha tere aks-e-KHayal ka

badla KHayal tu ne to sara jahan na tha

wo kar rahe the mujh ko wafaon mein puKHta-kar

mashq-e-sitam hai madd-e-nazar imtihan na tha

parwaz-e-fikr bhi rahi zauq-e-nazar ke sath

pabandi-e-qafas se mujhe kuchh ziyan na tha

tha eatibar-e-naqs-o-kamal-e-nigah-e-shauq

wo jalwa jo ayan bhi nahin tha nihan na tha

hum ko to iltifat-e-karam ka raha KHayal

warna zaban pe harf-e-tamanna giran na tha

bijli chamak chamak ke nazar Dalti rahi

girti kahan chaman mein mera aashiyan na tha

thi zindagi muhaal gham-e-ishq ke baghair

jo gham diya gaya tha gham-e-jawedan na tha

inkar karte kya ki zalum-o-jahul the

ye to nahin ki bar-e-amanat giran na tha

'shakir' hua wafa-e-musalsal se kaamyab

aaghaz-e-ishq mein to wo kuchh mehrban na tha