hum jo guzre unki mahfil ke qarib

ham jo guzre un kī mahfil ke qarīb

ik kasak sī rah ga.ī dil ke qarīb

sab ke sab baiThe the qātil ke qarīb

be-kasī thī sirf bismil ke qarīb

zindagī kyā thī 'ajab tūfān thī

ab kahīñ pahuñche haiñ manzil ke qarīb

is qadar ḳhud-rafta-e-sahrā hue

bhuul kar dekhā na mahmil ke qarīb

haa.e us muḳhtār kī majbūriyāñ

jis ne dam toḌā ho manzil ke qarīb

zindagī-o-maut vāhid aa.ina

aadmī hai hadd-e-fāsil ke qarīb

ye tajāhul ā'rifāna hai janāb

bhuul kar jaanā na ġhāfil ke qarīb

tarbiyat ko husn-e-sohbat chāhiye

baiThiye ustād-e-kāmil ke qarīb

hosh kī kahtā hai dīvāna sadā

aur māyūsī hai 'āqil ke qarīb

dekhiye un bad-nasīboñ kā ma.aal

vo jo Duube aa ke sāhil ke qarīb

chhā.ī hai 'gulzār' meñ fasl-e-ḳhizāñ

phuul haiñ sab gul shamā.il ke qarīb

hum jo guzre un ki mahfil ke qarib

ek kasak si rah gai dil ke qarib

sab ke sab baiThe the qatil ke qarib

be-kasi thi sirf bismil ke qarib

zindagi kya thi 'ajab tufan thi

ab kahin pahunche hain manzil ke qarib

is qadar KHud-rafta-e-sahra hue

bhul kar dekha na mahmil ke qarib

hae us muKHtar ki majburiyan

jis ne dam toDa ho manzil ke qarib

zindagi-o-maut wahid aaina

aadmi hai hadd-e-fasil ke qarib

ye tajahul aa'rifana hai janab

bhul kar jaana na ghafil ke qarib

tarbiyat ko husn-e-sohbat chahiye

baiThiye ustad-e-kaamil ke qarib

hosh ki kahta hai diwana sada

aur mayusi hai 'aqil ke qarib

dekhiye un bad-nasibon ka maal

wo jo Dube aa ke sahil ke qarib

chhai hai 'gulzar' mein fasl-e-KHizan

phul hain sab gul shamail ke qarib