hum jo in hathon ko masruf-e-amal rakhte hain

ham jo in hāthoñ ko masrūf-e-amal rakhte haiñ

mas.ale jo bhī hoñ ḳhud sāmne hal rakhte haiñ

apne hisse meñ faqat baaġh kī mehnat aa.ī

phuul rakhte haiñ na ham paas meñ phal rakhte haiñ

din ko muflis haiñ to kyā raat hai shāhoñ jaisī

ham bhī ḳhvāboñ meñ ka.ī tāj-mahal rakhte haiñ

ham unheñ dekh ke jiite haiñ sitam to dekho

jo hameñ dekh ke peshānī pe bal rakhte haiñ

ham vahāñ dars-e-vafā deñ bhī to kyā log jahāñ

buġhz sīnoñ meñ dimāġhoñ meñ ḳhalal rakhte haiñ

aap ke sheroñ meñ 'farhat' ġham-e-daurāñ kaisā

ahl-e-fan aap se ummīd-e-ġhazal rakhte haiñ

hum jo in hathon ko masruf-e-amal rakhte hain

masale jo bhi hon KHud samne hal rakhte hain

apne hisse mein faqat bagh ki mehnat aai

phul rakhte hain na hum pas mein phal rakhte hain

din ko muflis hain to kya raat hai shahon jaisi

hum bhi KHwabon mein kai taj-mahal rakhte hain

hum unhen dekh ke jite hain sitam to dekho

jo hamein dekh ke peshani pe bal rakhte hain

hum wahan dars-e-wafa den bhi to kya log jahan

bughz sinon mein dimaghon mein KHalal rakhte hain

aap ke sheron mein 'farhat' gham-e-dauran kaisa

ahl-e-fan aap se ummid-e-ghazal rakhte hain