hum kahan apni mohabbat mein KHalal chahte hain

ham kahāñ apnī mohabbat meñ ḳhalal chāhte haiñ

aap har baat pe kyoñ radd-e-‘amal chāhte haiñ

'ishq anjām ko pahuñche to sila miltā hai

aap āġhāz-e-mohabbat meñ hī phal chāhte haiñ

aaj kā daur mubārak ho tumhīñ ko logo

ham to apnā vahī guzrā huā kal chāhte haiñ

ham se dīvānoñ kī hasrat hī nahīñ is ke sivā

ham to mahbūb ke qadmoñ meñ ajal chāhte haiñ

kyā ḳhabar phir se mulāqāt huī yā na huī

ham tire qurb ke bas ek do pal chāhte haiñ

jaane vaale tū hameñ koī nishānī de jā

ham basānā tirī yādoñ kā mahal chāhte haiñ

ab to nādān tabī'at ko sañbhālo 'faisal'

apne hālāt bhī ab radd-o-badal chāhte haiñ

hum kahan apni mohabbat mein KHalal chahte hain

aap har baat pe kyon radd-e-‘amal chahte hain

'ishq anjam ko pahunche to sila milta hai

aap aaghaz-e-mohabbat mein hi phal chahte hain

aaj ka daur mubarak ho tumhin ko logo

hum to apna wahi guzra hua kal chahte hain

hum se diwanon ki hasrat hi nahin is ke siwa

hum to mahbub ke qadmon mein ajal chahte hain

kya KHabar phir se mulaqat hui ya na hui

hum tere qurb ke bas ek do pal chahte hain

jaane wale tu hamein koi nishani de ja

hum basana teri yaadon ka mahal chahte hain

ab to nadan tabi'at ko sanbhaalo 'faisal'

apne haalat bhi ab radd-o-badal chahte hain