hum KHak-nashinon pe tum ilhami ata ho

ham ḳhāk-nashīnoñ pe tum ilhāmī 'atā ho

jaise kisī majzūb kī maqbūl du'ā ho

le aao koī misr se mahbūb kā kurtā

taaki mirī āñkhoñ kā diyā phir se harā ho

is dhaj se manāne kā hunar us ko hai hāsil

maiñ phir se manā.ūñgā chalo phir se ḳhafā ho

duniyā meñ hasīñ laakh haiñ par tum se nahīñ haiñ

goyā tumheñ qudrat ne bhī fursat meñ bunā ho

aao kabhī sahrā meñ to ban jaa.e vo gulshan

is mausam-e-naumīd meñ paiġhām-e-ziyā ho

nikle hai du'ā dil se mire ye hī musalsal

gūñje jo mire ghar meñ faqat terī sadā ho

hai un kā bulāvā mujhe aise ki ye goyā

sarkār ke darbār se ye hukm milā ho

ye chīzeñ zarūrī haiñ taḳhayyul ko hamāre

ik jaam sar-e-shām ho aur bād-e-sabā ho

kuchh nukta-varoñ se bhī abhī tai na huā ye

kyā raaz tumhārā hai ki tum kaun ho kyā ho

ai kaash ki mujh ko bhī 'atā ho vo haqīqat

bas maiñ huuñ mirā yaar ho aur ġhār-e-hirā ho

tum asl meñ kyā ho ye 'ayāñ kyoñ nahīñ karte

sultān ho mahbūb ho but ho yā ḳhudā ho

hum KHak-nashinon pe tum ilhami 'ata ho

jaise kisi majzub ki maqbul du'a ho

le aao koi misr se mahbub ka kurta

taki meri aankhon ka diya phir se hara ho

is dhaj se manane ka hunar us ko hai hasil

main phir se manaunga chalo phir se KHafa ho

duniya mein hasin lakh hain par tum se nahin hain

goya tumhein qudrat ne bhi fursat mein buna ho

aao kabhi sahra mein to ban jae wo gulshan

is mausam-e-naumid mein paigham-e-ziya ho

nikle hai du'a dil se mere ye hi musalsal

gunje jo mere ghar mein faqat teri sada ho

hai un ka bulawa mujhe aise ki ye goya

sarkar ke darbar se ye hukm mila ho

ye chizen zaruri hain taKHayyul ko hamare

ek jam sar-e-sham ho aur baad-e-saba ho

kuchh nukta-waron se bhi abhi tai na hua ye

kya raaz tumhaara hai ki tum kaun ho kya ho

ai kash ki mujh ko bhi 'ata ho wo haqiqat

bas main hun mera yar ho aur ghaar-e-hira ho

tum asl mein kya ho ye 'ayan kyon nahin karte

sultan ho mahbub ho but ho ya KHuda ho