hum KHak se uTThe chashm-e-safar mein dasht sanbhaala kisht rakhi

ham ḳhaak se uTThe chashm-e-safar meñ dasht sañbhālā kisht rakhī

vahshat ke muāfiq sang na thā so shahriyyat kī ḳhisht rakhī

har samt zamīn meñ tah-dar-tah shajre ke jangal naqsh hue

ham lauh-o-qalam ke vāris the āsār meñ sirf navisht rakhī

jab aflātūn kā andhā bargad phailā to ġhaltān huā

sab tan ko javānī kaaT ga.ī to ḳhushk laboñ par hisht rakhī

ham zard kitāb ke jaltoñ ne tā'bīroñ kā hangām kiyā

jab lafzoñ ko sarsabz kiyā to pesh-e-nigāh bahisht rakhī

vo ahl-e-sulūk to sahrā meñ ik chaal chale ik Dhaal Dhale

ham rasta nāpne vāloñ ne qadmoñ kī jagah bālisht rakhī

kyā niiv rakheñ kyā lafz chuneñ dīvār-e-dil kī baat bane

ik sīdhī saadī iiñT kahī to us purkār ne ḳhisht rakhī

jab taḌke samay kā paat khulā chamkīlī ġhazal bhī jaag paḌī

ham ne bhī chhuan kī mehmānī meñ ā.īne kī sarisht rakhī

hum KHak se uTThe chashm-e-safar mein dasht sanbhaala kisht rakhi

wahshat ke muafiq sang na tha so shahriyyat ki KHisht rakhi

har samt zamin mein tah-dar-tah shajre ke jangal naqsh hue

hum lauh-o-qalam ke waris the aasar mein sirf nawisht rakhi

jab aflatun ka andha bargad phaila to ghaltan hua

sab tan ko jawani kaT gai to KHushk labon par hisht rakhi

hum zard kitab ke jalton ne ta'biron ka hangam kiya

jab lafzon ko sarsabz kiya to pesh-e-nigah bahisht rakhi

wo ahl-e-suluk to sahra mein ek chaal chale ek Dhaal Dhale

hum rasta napne walon ne qadmon ki jagah baalisht rakhi

kya niw rakhen kya lafz chunen diwar-e-dil ki baat bane

ek sidhi sadi inT kahi to us purkar ne KHisht rakhi

jab taDke samay ka pat khula chamkili ghazal bhi jag paDi

hum ne bhi chhuan ki mehmani mein aaine ki sarisht rakhi