hum KHushi pa ke gham ko bhul gae

ham ḳhushī pā ke ġham ko bhuul ga.e

farq-e-sahbā-o-sam ko bhuul ga.e

jab hue āshnā-e-lazzat-e-ġham

talḳhi-e-zahr-e-ġham ko bhuul ga.e

un ke lutf-o-karam ke maare hue

un ke jaur-o-sitam ko bhuul ga.e

chashm-e-sāqī se jab nigāh milī

bāda-kash jām-e-jam ko bhuul ga.e

phir koī aur kījiyegā sitam

dekhiye log ham ko bhuul ga.e

ham sitam-kosh ban ga.e to vo

apne tarz-e-sitam ko bhuul ga.e

raas aa.ī hai kab ḳhushī un ko

jo ḳhushī pā ke ġham ko bhuul ga.e

aise milte haiñ ajnabī kī tarah

jaise sach-much vo ham ko bhuul ga.e

un kā dar mil gayā to ai 'hairat'

ham bhī dair-o-haram ko bhuul ga.e

hum KHushi pa ke gham ko bhul gae

farq-e-sahba-o-sam ko bhul gae

jab hue aashna-e-lazzat-e-gham

talKHi-e-zahr-e-gham ko bhul gae

un ke lutf-o-karam ke mare hue

un ke jaur-o-sitam ko bhul gae

chashm-e-saqi se jab nigah mili

baada-kash jam-e-jam ko bhul gae

phir koi aur kijiyega sitam

dekhiye log hum ko bhul gae

hum sitam-kosh ban gae to wo

apne tarz-e-sitam ko bhul gae

ras aai hai kab KHushi un ko

jo KHushi pa ke gham ko bhul gae

aise milte hain ajnabi ki tarah

jaise sach-much wo hum ko bhul gae

un ka dar mil gaya to ai 'hairat'

hum bhi dair-o-haram ko bhul gae