hum ko dildar aziz apna dil-e-zar aziz

ham ko dildār aziiz apnā dil-e-zār aziiz

deñ na deñ jins-e-azīz aur ḳharīdār aziiz

ḳhvār rah kar hue barsoñ meñ vafādār aziiz

tūl-e-āzār se hote haiñ ye bīmār aziiz

is qadar kyoñ hai ḳhudā ishq kā āzār aziiz

mubtalā is meñ hamesha rahe do-chār aziiz

kabhī zindāñ se nikalne nahīñ detā bāhar

pāsbāñ ko haiñ magar is ke giraftār aziiz

ye sabab raunaq-e-dil ke vo matā.a-e-bāzār

yūsuf-e-dil hue yā yūsuf-e-bāzār aziiz

allah allāh butoñ kā vo tabaḳhtur vo ġhurūr

kis ke haiñ un ke sivā naḳhvat-o-pindār aziiz

kāfir-e-ishq-e-butāñ huuñ yahī maz.hab hai mirā

sūrat-e-rishta-e-jāñ hai mujhe zunnār aziiz

mujhe ai naala tirī be-asarī hai manzūr

rah mire dil meñ ki hai ḳhātir-e-dildār aziiz

ye mujhe kūcha-e-jānāñ se uThā laate haiñ

dost jo karte haiñ karnā nahīñ zinhār aziiz

qais dīvāna nahīñ thā to gayā kyoñ sū-e-dasht

hote haiñ kū-e-sanam ke dar-o-dīvār aziiz

dil-e-jāñ-bāz ko bhī abrū-e-qātil hai pasand

jis tarah mard sipāhī ko ho talvār aziiz

fitna-e-ishq meñ kyā shān-e-sar-afrāzī hai

ki chaḌhāte haiñ azīzoñ ko sar-e-dār aziiz

daulat-e-husn ġhulāmoñ ko banātī hai shaah

tohmat-e-ishq se hote haiñ subuksār aziiz

terī shāmat hai 'zakī' baiThe-baiThā.e tū ne

kyoñ hasīnoñ ko diyā dil ki huā ḳhvār aziiz

hum ko dildar aziz apna dil-e-zar aziz

den na den jins-e-aziz aur KHaridar aziz

KHwar rah kar hue barson mein wafadar aziz

tul-e-azar se hote hain ye bimar aziz

is qadar kyon hai KHuda ishq ka aazar aziz

mubtala is mein hamesha rahe do-chaar aziz

kabhi zindan se nikalne nahin deta bahar

pasban ko hain magar is ke giraftar aziz

ye sabab raunaq-e-dil ke wo mataa-e-bazar

yusuf-e-dil hue ya yusuf-e-bazar aziz

allah allah buton ka wo tabaKHtur wo ghurur

kis ke hain un ke siwa naKHwat-o-pindar aziz

kafir-e-ishq-e-butan hun yahi mazhab hai mera

surat-e-rishta-e-jaan hai mujhe zunnar aziz

mujhe ai nala teri be-asari hai manzur

rah mere dil mein ki hai KHatir-e-dildar aziz

ye mujhe kucha-e-jaanan se uTha late hain

dost jo karte hain karna nahin zinhaar aziz

qais diwana nahin tha to gaya kyon su-e-dasht

hote hain ku-e-sanam ke dar-o-diwar aziz

dil-e-jaan-baz ko bhi abru-e-qatil hai pasand

jis tarah mard sipahi ko ho talwar aziz

fitna-e-ishq mein kya shan-e-sar-afraazi hai

ki chaDhate hain azizon ko sar-e-dar aziz

daulat-e-husn ghulamon ko banati hai shah

tohmat-e-ishq se hote hain subuksar aziz

teri shamat hai 'zaki' baiThe-baiThae tu ne

kyon hasinon ko diya dil ki hua KHwar aziz