hum ko is ka bhi kuchh gila na hua

ham ko is kā bhī kuchh gilā na huā

koī va.ada vafā huā na huā

aap kā kaun sā kahā na huā

merī qismat kā jo likhā na huā

umr bhar kī qazā adā hotī

farz aisā koī adā na huā

maiñ ne minnat bhī kī ḳhushāmad bhī

us pe lekin asar zarā na huā

ātish-e-hijr meñ jalā barsoñ

dil magar phir bhī kaam kā na huā

ḳhūgar-e-ġham bane bhī ham to kyā

dil hī jab dard-āshnā na huā

ye bhī ik ittifāq thā shāyad

zaḳhm-e-dil phir koī harā na huā

ham se tauba-shikan kahāñ hoñge

bāb-e-rahmat kahīñ jo vā na huā

aap 'zamzam' bane sabhī ke magar

is pe bhī koī aap kā na huā

hum ko is ka bhi kuchh gila na hua

koi wada wafa hua na hua

aap ka kaun sa kaha na hua

meri qismat ka jo likha na hua

umr bhar ki qaza ada hoti

farz aisa koi ada na hua

main ne minnat bhi ki KHushamad bhi

us pe lekin asar zara na hua

aatish-e-hijr mein jala barson

dil magar phir bhi kaam ka na hua

KHugar-e-gham bane bhi hum to kya

dil hi jab dard-ashna na hua

ye bhi ek ittifaq tha shayad

zaKHm-e-dil phir koi hara na hua

hum se tauba-shikan kahan honge

bab-e-rahmat kahin jo wa na hua

aap 'zamzam' bane sabhi ke magar

is pe bhi koi aap ka na hua