hum ko kafi nahin bas shaKH se jhaDne ka sukun

ham ko kaafī nahīñ bas shāḳh se jhaḌne kā sukūn

chāhiye pattoñ ko bas miTTī meñ saḌne kā sukūn

saare chhūTe hue hāthoñ kī vo bharpā.ī hai

sāmne sab ke tire haath pakaḌne kā sukūn

kaafī kam hotī hai ab baat ke banñe kī ḳhushī

ab mujhe hotā hai bas baat bigaḌne kā sukūn

mausam-e-hijr meñ har baar kisī se milnā

mausam-e-‘ishq meñ phir us se bichhaḌne kā sukūn

yuuñ mohabbat se mujhe dekhnā us kā aur phir

logoñ kī āñkhoñ meñ is baat ke gaḌhne kā sukūn

ham musāfir haiñ hamārī ḳhushī ghar meñ nahīñ hai

bas ga.e to hameñ yaad aaya ujaḌne kā sukūn

ab na jhagḌe na shikāyat na koī bahs 'kunāl'

haa.e us shaḳhs se har baat pe laḌne kā sukūn

hum ko kafi nahin bas shaKH se jhaDne ka sukun

chahiye patton ko bas miTTi mein saDne ka sukun

sare chhuTe hue hathon ki wo bharpai hai

samne sab ke tere hath pakaDne ka sukun

kafi kam hoti hai ab baat ke banne ki KHushi

ab mujhe hota hai bas baat bigaDne ka sukun

mausam-e-hijr mein har bar kisi se milna

mausam-e-‘ishq mein phir us se bichhaDne ka sukun

yun mohabbat se mujhe dekhna us ka aur phir

logon ki aankhon mein is baat ke gaDhne ka sukun

hum musafir hain hamari KHushi ghar mein nahin hai

bas gae to hamein yaad aaya ujaDne ka sukun

ab na jhagDe na shikayat na koi bahs 'kunal'

hae us shaKHs se har baat pe laDne ka sukun