hum ko kiya hai waqt ne majbur kya karen

ham ko kiyā hai vaqt ne majbūr kyā kareñ

is vāste haiñ aap se ham duur kyā kareñ

ḳhud ko is anjuman meñ vo mash.hūr kyā kareñ

duniyā hai kam-nasīboñ kī be-nūr kyā kareñ

ḳhūn-e-shu.ūr ḳhūn-e-vafā ḳhūn-e-ārzū

jalne lage haiñ sūrat-e-nāsūr kyā kareñ

daulat kā sikka chaltā hai saare hī shahr meñ

nādār kyā kareñ yahāñ majbūr kyā kareñ

pahle hī be-hijāb nazar aa rahe haiñ vo

un ko dil-o-nigāh meñ mastūr kyā kareñ

ḳhāmosh is ḳhayāl se baiThe haiñ bazm meñ

rūdād-e-ġham se aap ko ranjūr kyā kareñ

puurī ho kis tarah dil-e-muztar kī aarzū

badlā hai husn-o-ishq kā dastūr kyā kareñ

rāhat kī baat kis tarah aa.e zabān par

baḌhne lage haiñ qalb ke nāsūr kyā kareñ

bār-e-ġham-e-hayāt uThā to liyā magar

'qaisar' haiñ apne vaqt se majbūr kyā kareñ

hum ko kiya hai waqt ne majbur kya karen

is waste hain aap se hum dur kya karen

KHud ko is anjuman mein wo mashhur kya karen

duniya hai kam-nasibon ki be-nur kya karen

KHun-e-shuur KHun-e-wafa KHun-e-arzu

jalne lage hain surat-e-nasur kya karen

daulat ka sikka chalta hai sare hi shahr mein

nadar kya karen yahan majbur kya karen

pahle hi be-hijab nazar aa rahe hain wo

un ko dil-o-nigah mein mastur kya karen

KHamosh is KHayal se baiThe hain bazm mein

rudad-e-gham se aap ko ranjur kya karen

puri ho kis tarah dil-e-muztar ki aarzu

badla hai husn-o-ishq ka dastur kya karen

rahat ki baat kis tarah aae zaban par

baDhne lage hain qalb ke nasur kya karen

bar-e-gham-e-hayat uTha to liya magar

'qaisar' hain apne waqt se majbur kya karen