hum ko nahin hai dost teri zat ka gila

ham ko nahīñ hai dost terī zaat kā gila

ham kar rahe haiñ gardish-e-hālāt kā gila

pal bhar ke vāste dil agar Dūbtā lage

rahtā nahīñ hai phir bhī kisī baat kā gila

jo bhī qadam uThā vo tire izn par uThā

ham kar rahe haiñ apnī hī auqāt kā gila

dil ne ḳhud apne aap ko samjhāyā bārhā

jab bhī kiyā hai terī ināyāt kā gila

har shai ko dekh saktīñ ye āñkhoñ meñ bal kahāñ

andhe ko kaise ho bhalā din raat kā gila

mil kar bhī in diloñ meñ rahī ik na ik kasak

hoñToñ pe aaya jab bhī mulāqāt kā gila

ye jaan kar ki merā asāsa haiñ chaar phuul

kartā hai kyoñ ġharīb se sauġhāt kā gila

hum ko nahin hai dost teri zat ka gila

hum kar rahe hain gardish-e-haalat ka gila

pal bhar ke waste dil agar Dubta lage

rahta nahin hai phir bhi kisi baat ka gila

jo bhi qadam uTha wo tere izn par uTha

hum kar rahe hain apni hi auqat ka gila

dil ne KHud apne aap ko samjhaya barha

jab bhi kiya hai teri inayat ka gila

har shai ko dekh saktin ye aankhon mein bal kahan

andhe ko kaise ho bhala din raat ka gila

mil kar bhi in dilon mein rahi ek na ek kasak

honTon pe aaya jab bhi mulaqat ka gila

ye jaan kar ki mera asasa hain chaar phul

karta hai kyon gharib se saughat ka gila