hum musafir hain ki maqsud-e-safar jaante hain

ham musāfir haiñ ki maqsūd-e-safar jānte haiñ

kaise bantī hai koī rāhguzar jānte haiñ

be-gharī zād-e-safar ho to Thaharnā kaisā

itne ādāb to ye ḳhāk-ba-sar jānte haiñ

rāh-e-sunnat bhī yahī jāda-e-hijrat bhī yahī

paañv ruk jaa.eñ jahāñ bhī use ghar jānte haiñ

kyā ḳhabar Duub ke ubhrīñ ki ubhar kar Dūbeñ

ziist ko ham to samundar kā safar jānte haiñ

kitnī is daur meñ āzādī hai majbūroñ ko

ḳhauf kī aag meñ jalte hue par jānte haiñ

ḳhushk hoñToñ pe likhī hai ye kahānī kis ne

kah nahīñ sakte magar dīda-e-tar jānte haiñ

koī mahram hai ki mahrūm hameñ kyā mālūm

un se pūchho jo maqāmāt-e-nazar jānte haiñ

ham ko aate nahīñ andāz-e-hunar-mandī-e-fan

ye alag baat ki tauqīr-e-hunar jānte haiñ

ghar se bāhar jo nikalte hī nahīñ haiñ 'at.har'

kitnī āsān tirī rāhguzar jānte haiñ

hum musafir hain ki maqsud-e-safar jaante hain

kaise banti hai koi rahguzar jaante hain

be-ghari zad-e-safar ho to Thaharna kaisa

itne aadab to ye KHak-ba-sar jaante hain

rah-e-sunnat bhi yahi jada-e-hijrat bhi yahi

panw ruk jaen jahan bhi use ghar jaante hain

kya KHabar Dub ke ubhrin ki ubhar kar Duben

zist ko hum to samundar ka safar jaante hain

kitni is daur mein aazadi hai majburon ko

KHauf ki aag mein jalte hue par jaante hain

KHushk honTon pe likhi hai ye kahani kis ne

kah nahin sakte magar dida-e-tar jaante hain

koi mahram hai ki mahrum hamein kya malum

un se puchho jo maqamat-e-nazar jaante hain

hum ko aate nahin andaz-e-hunar-mandi-e-fan

ye alag baat ki tauqir-e-hunar jaante hain

ghar se bahar jo nikalte hi nahin hain 'athar'

kitni aasan teri rahguzar jaante hain