hum na kahenge KHud hi batao kya ye achchha karte ho

ham na kaheñge ḳhud hī batāo kyā ye achchhā karte ho

phuul se nāzuk jism ke andar patthar sā dil rakhte ho

tum se bichhaḌ kar mar jā.ūñgā yā pāgal ho jā.ūñgā

mujh se judā ho kar tum bhī ārām se kab rah sakte ho

ek se baḌh kar ek hasīñ haiñ chehre aur bhī duniyā meñ

āḳhir mujh ko ik tum hī kyoñ sab se achchhe lagte ho

chalte ho to bād-e-sabā bhī saath tumhāre chaltī hai

phuul baraste haiñ hoñToñ se jab tum bāteñ karte ho

ik maiñ huuñ jo ġham meñ tumhāre ḳhuun ke aañsū rotā huuñ

ik tum ho jo mujh ko pāgal jaan ke mujh par hañste ho

aap hī aap khiñchā jaatā hai dil kambaḳht tumhārī or

āḳhir mujh par o jādūgar kyā jaadū kar baiThe ho

maiñ huuñ ik badnām-e-zamāna dekho mere saath na aao

ho jāoge muft meñ rusvā kyoñ nādānī karte ho

lagtā hai tum ne bhī kahīñ par zaḳhm-e-mohabbat khāyā hai

tab hī to itne gum-sum aur kho.e kho.e rahte ho

'tābish' ye kyā pāgal-pan hai yaad meñ ik harjā.ī ke

saarī duniyā soī hai tum baiThe taare ginte ho

hum na kahenge KHud hi batao kya ye achchha karte ho

phul se nazuk jism ke andar patthar sa dil rakhte ho

tum se bichhaD kar mar jaunga ya pagal ho jaunga

mujh se juda ho kar tum bhi aaram se kab rah sakte ho

ek se baDh kar ek hasin hain chehre aur bhi duniya mein

aaKHir mujh ko ek tum hi kyon sab se achchhe lagte ho

chalte ho to baad-e-saba bhi sath tumhaare chalti hai

phul baraste hain honTon se jab tum baaten karte ho

ek main hun jo gham mein tumhaare KHun ke aansu rota hun

ek tum ho jo mujh ko pagal jaan ke mujh par hanste ho

aap hi aap khincha jata hai dil kambaKHt tumhaari or

aaKHir mujh par o jadugar kya jadu kar baiThe ho

main hun ek badnam-e-zamana dekho mere sath na aao

ho jaoge muft mein ruswa kyon nadani karte ho

lagta hai tum ne bhi kahin par zaKHm-e-mohabbat khaya hai

tab hi to itne gum-sum aur khoe khoe rahte ho

'tabish' ye kya pagal-pan hai yaad mein ek harjai ke

sari duniya soi hai tum baiThe tare ginte ho