hum na tanha us gali se jaan ko kho kar uTh gae

ham na tanhā us galī se jaañ ko kho kar uTh ga.e

saikḌoñ yaañ zindagī se haath dho kar uTh ga.e

dekhne paa.e na ham ashkoñ kā apne kuchh samar

tuḳhm goyā yaas ke ye the jo bo kar uTh ga.e

kal tire bin baaġh maiñ kuchh dil na apnā jo lagā

ashk-e-ḳhūnīñ meñ guloñ ko ham Dubo kar uTh ga.e

loTte haiñ is adā-o-nāz par aur ġhash meñ ham

the vo ahmaq jo ki terī khā ke Thokar uTh ga.e

jān-o-dil ham ik jagah baiThe the kūche meñ tire

pāsbāñ ke haath se āvāra ho kar uTh ga.e

tū gayā thā DhūñDhne un ko kahāñ ve to 'hasan'

tere ghar meñ aa.e baiThe leTe so kar uTh ga.e

hum na tanha us gali se jaan ko kho kar uTh gae

saikDon yan zindagi se hath dho kar uTh gae

dekhne pae na hum ashkon ka apne kuchh samar

tuKHm goya yas ke ye the jo bo kar uTh gae

kal tere bin bagh main kuchh dil na apna jo laga

ashk-e-KHunin mein gulon ko hum Dubo kar uTh gae

loTte hain is ada-o-naz par aur ghash mein hum

the wo ahmaq jo ki teri kha ke Thokar uTh gae

jaan-o-dil hum ek jagah baiThe the kuche mein tere

pasban ke hath se aawara ho kar uTh gae

tu gaya tha DhunDhne un ko kahan we to 'hasan'

tere ghar mein aae baiThe leTe so kar uTh gae