hum na-shanas-e-rah the sab se juda chale

ham nā-shanās-e-rāh the sab se judā chale

par apnī justujū meñ zamāne ko pā chale

ab kuchh nahīñ hai paas na ‘ibrat na ishtiyāq

thī ik matā’-e-hosh so vo bhī gañvā chale

terī kasāfatoñ se kisī ko ġharaz na thī

ai zindagī ye baar bhī ham hī uThā chale

ab raushnī bhī ziist kā maqsad nahīñ rahī

jaltā huuñ is ġharaz se ki shāyad havā chale

chhū kar mujhe na dekh ki ye maiñ nahīñ huuñ dost

ik baar mujh ko toḌ ki merā pata chale

ye kaisī chup lagī hai ki but ban gayā huuñ maiñ

māyūs ho ke mujh se mire ham-navā chale

anjān ghāTiyoñ kā safar aur añdherī raat

chalnā ho jis ko saath vo mere chalā chale

hum na-shanas-e-rah the sab se juda chale

par apni justuju mein zamane ko pa chale

ab kuchh nahin hai pas na ‘ibrat na ishtiyaq

thi ek mata’-e-hosh so wo bhi ganwa chale

teri kasafaton se kisi ko gharaz na thi

ai zindagi ye bar bhi hum hi uTha chale

ab raushni bhi zist ka maqsad nahin rahi

jalta hun is gharaz se ki shayad hawa chale

chhu kar mujhe na dekh ki ye main nahin hun dost

ek bar mujh ko toD ki mera pata chale

ye kaisi chup lagi hai ki but ban gaya hun main

mayus ho ke mujh se mere ham-nawa chale

anjaan ghaTiyon ka safar aur andheri raat

chalna ho jis ko sath wo mere chala chale