ham-nafas sayyaad jis din mehrban ho jaega

ham-nafas sayyād jis din mehrbāñ ho jā.egā

dekh lenā ye qafas bhī āshiyāñ ho jā.egā

tishna-lab sūfār dil meñ ḳhuun kā qatra nahīñ

ham se āzurda hamārā mehmāñ ho jā.egā

kyā zarūrat hai ki maiñ apnī zabāñ se kuchh kahūñ

ġhair kā merā kisī din imtihāñ ho jā.egā

kuchh dinoñ gar aur aisā hī hujūm-e-ġham rahā

ḳhātma ik roz chashm-e-ḳhūñ-fishāñ ho jā.egā

jab.ha-sā.ī tere dar kī maiñ karūñgā sub.h-o-shām

ka.aba-e-maqsūd terā āstāñ ho jā.egā

tum ko dikhlā deñge gar badlī zamāne kī havā

ġhair kā qissa hamārī dāstāñ ho jā.egā

un se chhiḌ jā.eñgī bāteñ ranj kī shām-e-visāl

kyā ḳhabar thī dushman-e-jāñ āsmāñ ho jā.egā

chāhiye 'mas.ūd' kuchh zād-e-safar kī fikr bhī

chañd hī din meñ ravāna kārvāñ ho jā.egā

ham-nafas sayyaad jis din mehrban ho jaega

dekh lena ye qafas bhi aashiyan ho jaega

tishna-lab sufar dil mein KHun ka qatra nahin

hum se aazurda hamara mehman ho jaega

kya zarurat hai ki main apni zaban se kuchh kahun

ghair ka mera kisi din imtihan ho jaega

kuchh dinon gar aur aisa hi hujum-e-gham raha

KHatma ek roz chashm-e-KHun-fishan ho jaega

jabha-sai tere dar ki main karunga subh-o-sham

kaba-e-maqsud tera aastan ho jaega

tum ko dikhla denge gar badli zamane ki hawa

ghair ka qissa hamari dastan ho jaega

un se chhiD jaengi baaten ranj ki sham-e-visal

kya KHabar thi dushman-e-jaan aasman ho jaega

chahiye 'masud' kuchh zad-e-safar ki fikr bhi

chand hi din mein rawana karwan ho jaega