ham-nashin zid na kar ahwal batane ke liye

ham-nashīñ zid na kar ahvāl batāne ke liye

ġham chhupāne ke liye hai ki sunāne ke liye

dil milā siina milā jism milā jaan milī

daaġh khāne ke liye ranj uThāne ke liye

duur hī se vo mujhe dekh kar un kā kahnā

phir ye hazrat chale aate haiñ satāne ke liye

imtihāñ ishq-o-havas kā hai kal us mahfil meñ

ruq.e ab baTte haiñ jāñ-bāzoñ ke aane ke liye

chāhiye thā tire ushshāq ko dil do milte

ik tujhe dene ko ik naaz uThāne ke liye

ahd-e-farhād huā ham se to pahle varna

jaate kambaḳht kā ham haath baTāne ke liye

yahī behtar hai ki chupkā rahūñ jhagḌā chuk jaa.e

varna bāteñ haiñ bahut baat baḌhāne ke liye

hosh se kyoñ na ho pyārī mujhe ye be-hoshī

aa.e to laḳhlaḳha-e-zulf suñghāne ke liye

kar diyā ishq ne har shaḳhs se bad-zan mujh ko

ab kise bhejūñ vahāñ un ko bulāne ke liye

ai dil us ko bhī hai dar-parda mohabbat terī

sitam-o-jaur haiñ ġhairoñ ko dikhāne ke liye

ham se āshiq kī mohabbat nahīñ dekhī jaatī

us ne ye uzr nikālā hai na aane ke liye

chhoḌ kar va.az karo bāda-faroshī vaa.iz

peshe bahutere haiñ duniyā meñ kamāne ke liye

fā.eda aur to kuchh charḳh-e-sitamgar se nahīñ

ye hasīnoñ ko hai bedād sikhāne ke liye

ghar se kis be-ḳhudī-e-shauq meñ niklā hai 'ḳhayāl'

apne rūThe hue dilbar ko manāne ke liye

ham-nashin zid na kar ahwal batane ke liye

gham chhupane ke liye hai ki sunane ke liye

dil mila sina mila jism mila jaan mili

dagh khane ke liye ranj uThane ke liye

dur hi se wo mujhe dekh kar un ka kahna

phir ye hazrat chale aate hain satane ke liye

imtihan ishq-o-hawas ka hai kal us mahfil mein

ruqe ab baTte hain jaan-bazon ke aane ke liye

chahiye tha tere ushshaq ko dil do milte

ek tujhe dene ko ek naz uThane ke liye

ahd-e-farhad hua hum se to pahle warna

jate kambaKHt ka hum hath baTane ke liye

yahi behtar hai ki chupka rahun jhagDa chuk jae

warna baaten hain bahut baat baDhane ke liye

hosh se kyon na ho pyari mujhe ye be-hoshi

aae to laKHlaKHa-e-zulf sunghane ke liye

kar diya ishq ne har shaKHs se bad-zan mujh ko

ab kise bhejun wahan un ko bulane ke liye

ai dil us ko bhi hai dar-parda mohabbat teri

sitam-o-jaur hain ghairon ko dikhane ke liye

hum se aashiq ki mohabbat nahin dekhi jati

us ne ye uzr nikala hai na aane ke liye

chhoD kar waz karo baada-faroshi waiz

peshe bahutere hain duniya mein kamane ke liye

faeda aur to kuchh charKH-e-sitamgar se nahin

ye hasinon ko hai bedad sikhane ke liye

ghar se kis be-KHudi-e-shauq mein nikla hai 'KHayal'

apne ruThe hue dilbar ko manane ke liye