humne aankh se dekha kitne suraj nikle Dub gae

ham ne aañkh se dekhā kitne sūraj nikle Duub ga.e

lekin tāroñ se pūchho kab nikle chamke Duub ga.e

do saa.e pahle ākāsh tale sāhil par baiThe the

lahroñ ne lipTānā chāhā aur bechāre Duub ga.e

peḌoñ par jo naam likhe the vo to ab bhī baaqī haiñ

lekin jitne bhī tālāb meñ patthar pheñke Duub ga.e

ūñche ghar ākāsh chhupā kar apne aap pe nāzāñ haiñ

chāroñ or khule ākāsh ke sūraj pīchhe Duub ga.e

ab to hameñ ik sher kā honā bhī nā-mumkin lagtā hai

ab to din kī niilī jhiil meñ raat ke taare Duub ga.e

hum ne aankh se dekha kitne suraj nikle Dub gae

lekin taron se puchho kab nikle chamke Dub gae

do sae pahle aakash tale sahil par baiThe the

lahron ne lipTana chaha aur bechaare Dub gae

peDon par jo nam likhe the wo to ab bhi baqi hain

lekin jitne bhi talab mein patthar phenke Dub gae

unche ghar aakash chhupa kar apne aap pe nazan hain

chaaron or khule aakash ke suraj pichhe Dub gae

ab to hamein ek sher ka hona bhi na-mumkin lagta hai

ab to din ki nili jhil mein raat ke tare Dub gae