humne arman-e-bahaaran na nikalte dekha

ham ne armān-e-bahārāñ na nikalte dekhā

baaġh ko bād-e-bahārī se bhī jalte dekhā

iltifāt-e-nigah-e-nāz se ho kar mahrūm

ham ne kis kis ko nigāheñ na badalte dekhā

jaam meñ 'aks-e-jamāl-e-ruḳh-e-sāqī thā ki aaj

chāñdnī raat meñ ḳhurshīd nikalte dekhā

ham ne andāz vafāoñ ke hazāroñ badle

rang bedād-garoñ kā na badalte dekhā

ḳhuld bhī jis ke na hone se jahannum hotī

shaiḳh sāhab ko usī chiiz se jalte dekhā

fāsloñ ke koī mā'nā hī mohabbat meñ nahīñ

chāñd ko bahr ke pahlū meñ machalte dekhā

ham se pūchho ġham-e-mahbūb kī lazzat ki 'adīb'

ham ne is zahr ko tāsīr badalte dekhā

hum ne arman-e-bahaaran na nikalte dekha

bagh ko baad-e-bahaari se bhi jalte dekha

iltifat-e-nigah-e-naz se ho kar mahrum

hum ne kis kis ko nigahen na badalte dekha

jam mein 'aks-e-jamal-e-ruKH-e-saqi tha ki aaj

chandni raat mein KHurshid nikalte dekha

hum ne andaz wafaon ke hazaron badle

rang bedad-garon ka na badalte dekha

KHuld bhi jis ke na hone se jahannum hoti

shaiKH sahab ko usi chiz se jalte dekha

faslon ke koi ma'na hi mohabbat mein nahin

chand ko bahr ke pahlu mein machalte dekha

hum se puchho gham-e-mahbub ki lazzat ki 'adib'

hum ne is zahr ko tasir badalte dekha